విశాఖ జిల్లా రాంబాబు: ఆర్టీసీ కండక్టర్గా పనిచేస్తూ క్రీడాకారులకు ఉచిత శిక్షణ ఇస్తున్నారు

విశాఖపట్నం జిల్లా ఆనందపురం మండలం సోయాం గ్రామానికి చెందిన రాంబాబు ప్రస్తుతం సింహాచలం ఆర్టీసీ డిపోలో కండక్టర్గా పనిచేస్తున్నారు. చిన్నప్పటి నుంచి పరుగు పందాలపై ఆసక్తి ఉన్న రాంబాబు ఇంటర్, డిగ్రీ, యూనివర్సిటీ స్థాయిల్లో ఆల్ రౌండ్ ఛాంపియన్గా నిలిచారు. సైన్యంలో చేరాలని ప్రయత్నించినా గాయం కారణంగా వెనక్కి తగ్గినా క్రీడలను వదల్లేదు.

ఇప్పటివరకు జాతీయ, అంతర్జాతీయ స్థాయి పోటీల్లో 72 పతకాలు సాధించారు. ఇటీవల బ్యాంకాక్లో 44 దేశాల ఈవెంట్లో 200 మీటర్లు, 50 మీటర్ల పరుగులో స్వర్ణాలు, 100 మీటర్లలో రజతం గెలిచారు. చెన్నైలో జరిగిన ఆసియా మాస్టర్స్ మీట్లోనూ స్వర్ణం సాధించారు. డ్యూటీలో ఒకరోజు, సెలవు రోజు కుదిరితే ఆనందపురం, పద్మనాభం, తగరపు వలస వంటి మండలాల నిరుపేద యువతకు ఉచితంగా క్రీడా శిక్షణ ఇస్తున్నారు. రాంబాబు వద్ద శిక్షణ పొందిన సుమారు 80 మందికి పైగా ఆర్మీ, రైల్వే, పోలీస్ వంటి ప్రభుత్వ ఉద్యోగాలు వచ్చాయి.

2017లో వెన్నుపూసకు తీవ్ర గాయమై సర్జరీ అనంతరం 13 నెలలు మంచాన ఉన్నారు. భార్య, మహిళా సంఘాలు, గ్రామస్తుల సహకారంతో ఫిజియోథెరపీ, యోగా, ధ్యానం ద్వారా కోలుకొని మళ్లీ పరుగు పందెం ప్రారంభించారు. "నడవలేని స్థితి నుంచి మళ్లీ అంతర్జాతీయ వేదికపై పరిగెత్తడం నిజంగా గొప్ప విషయం" అని రాంబాబు చెబుతున్నారు.

ఆయన ఇద్దరు కూతుళ్లు కూడా క్రీడల్లో రాణిస్తున్నారు. పెద్దమ్మాయి ఇప్పటికే జాతీయ స్థాయి పోటీలు ఆడగా, చిన్నమ్మాయి విశాఖ రైల్వే స్టేడియంలో శిక్షణ పొందుతూ రాష్ట్ర స్థాయిలో విజయాలు సాధిస్తోంది. ఓటములను గెలుపులకు మెట్లుగా భావించాలని యువతకు రాంబాబు సూచిస్తున్నారు.