కరీంనగర్ జిల్లా: అలుగునూర్ వద్ద ఆర్టీసీ ఎలక్ట్రిక్ బస్సు దగ్ధం, ప్రయాణికులు సురక్షితం

కరీంనగర్ జిల్లా అలుగునూర్ శివారులో ఆర్టీసీ ఎలక్ట్రిక్ బస్సు మంటల్లో పూర్తిగా దగ్ధమైంది. కాకతీయ కాలువ సమీపంలో ఈ ఘటన చోటు చేసుకుంది.

బస్సు నుంచి ఒక్కసారిగా మంటలు రావడం గమనించిన డ్రైవర్ వెంటనే వాహనాన్ని పక్కకు ఆపారు. పెట్రోల్ బంక్ సమీపంలో మంటలు వ్యాపించకుండా బస్సును ముందుకు తీసుకెళ్లి సురక్షిత ప్రాంతంలో నిలిపారు.

డ్రైవర్ అప్రమత్తమై ప్రయాణికులను వెంటనే కిందకు దింపడంతో ఎవరికీ గాయాలు కాలేదు. షార్ట్ సర్క్యూట్ కారణంగా ఈ మంటలు చెలరేగినట్లు అనుమానిస్తున్నారు.

ఘటనపై ఆర్టీసీ అధికారులు విచారణ ప్రారంభించారు. బస్సు పూర్తిగా కాలిపోయింది.