రైతు భరోసా: 70.40 లక్షల మంది రైతులకు ₹875.96 కోట్లు జమ

జగిత్యాల జిల్లా ధర్మపురి క్యాంప్ కార్యాలయంలో ఏర్పాటు చేసిన మీడియా సమావేశంలో రాష్ట్ర సంక్షేమ శాఖ మంత్రి అడ్లూరి లక్ష్మణ్ కుమార్ మాట్లాడారు. రైతు భరోసా నిధుల విడుదలకు సంబంధించిన వివరాలను ఆయన వెల్లడించారు.

తెలంగాణ రాష్ట్ర వ్యాప్తంగా మొత్తం 70,40,286 మంది రైతుల ఖాతాల్లో సుమారు 875.96 కోట్ల రూపాయలు జమ చేసినట్లు మంత్రి తెలిపారు. ధర్మపురి నియోజకవర్గంలో 90,761 మంది రైతులకు 87.21 కోట్లు, జగిత్యాల జిల్లా మొత్తంలో 2,29,213 మంది రైతులకు 243.40 కోట్లు జమ అయ్యాయని వివరించారు.

గతంలో మాజీ ముఖ్యమంత్రి కేసీఆర్ నాయకత్వంలోని బీఆర్ఎస్ ప్రభుత్వం రాష్ట్రాన్ని ఆర్థిక సంక్షోభంలోకి నెట్టిందని మంత్రి విమర్శించారు. ఆ అప్పుల వడ్డీలు ప్రతి నెలా చెల్లించాల్సిన పరిస్థితి ఉన్నప్పటికీ, ప్రజలకిచ్చిన హామీలను ప్రస్తుతం కాంగ్రెస్ ప్రభుత్వం అమలు చేస్తోందని ఆయన పేర్కొన్నారు.

ఈ ప్రభుత్వం రైతు భరోసా ఇవ్వదని టీఆర్ఎస్ నాయకులు గతంలో చేసిన వ్యాఖ్యలను గుర్తు చేసిన మంత్రి, 70 లక్షల మందికి పైగా రైతులకు నేరుగా అకౌంట్లో నిధులు జమ చేస్తున్నామని స్పష్టం చేశారు. రైతు సంక్షేమమే ప్రభుత్వ లక్ష్యమని ఆయన అన్నారు.