జడ్చర్లలో టీచర్ చొరవతో 852 రకాల మొక్కలతో ప్రత్యేక బొటానికల్ గార్డెన్

మహబూబ్‌నగర్ జిల్లా జడ్చర్లలోని ప్రభుత్వ డిగ్రీ కాలేజీలో 852 రకాల మొక్కలతో ఒక ప్రత్యేక బొటానికల్ గార్డెన్‌ను ఏర్పాటు చేశారు. ఈ గార్డెన్‌లో 7,000కు పైగా చెట్లు ఉన్నాయి. కాలేజీలో బోటనీ లెక్చరర్‌గా పనిచేస్తున్న సదాశివయ్య సార్ చొరవతో ఈ గార్డెన్ రూపుదిద్దుకుంది.

విద్యార్థులు, స్థానికులు స్వచ్ఛందంగా మొక్కలు అందించడంతో 5.5 ఎకరాల క్యాంపస్‌లో ఈ హరిత పార్కు ఏర్పడింది. గార్డెన్‌లో ప్రతి మొక్కకు క్యూఆర్ కోడ్ ఉండడం విశేషం. సెల్‌ఫోన్‌తో స్కాన్ చేస్తే మొక్క పేరు, దాని ఔషధ గుణాలు, ఉపయోగాలు కనిపిస్తాయి. కోతుల నుంచి రక్షణ కోసం ఒక ‘మంకీ ఫుడ్ కోర్ట్’ కూడా ఏర్పాటు చేశారు. ఇందులో 70 రకాల పండ్ల మొక్కలు నాటారు.

చిన్న పిల్లల కోసం బటర్‌ఫ్లై పార్క్, వయోవృద్ధుల ఆధ్యాత్మిక అవసరాల కోసం పంచవట వనం, నక్షత్ర వనం వంటి ప్రత్యేక విభాగాలు ఉన్నాయి. మొక్కలకు ఎలాంటి రసాయనాలు వాడకుండా సేంద్రియ పద్ధతిలో సంరక్షిస్తున్నారు. కాలేజీ విద్యార్థులు తమ బోటనీ ప్రాక్టికల్స్ నేరుగా ఈ గార్డెన్‌లోనే చేస్తారు. ఇక్కడ సృష్టించిన వాతావరణం కారణంగా అనేక అంతరించిపోతున్న జాతుల మొక్కలు కూడా పెరుగుతున్నాయి.