పిఠాపురం AE నూకరాజు కుటుంబ మరణాల కేసులో సాదిక్ ఖాన్ను కాకినాడకు తీసుకొచ్చిన పోలీసులు

కాకినాడ జిల్లా పిఠాపురం పంచాయతీరాజ్ AE నూకరాజు కుటుంబ మరణాల కేసులో నిందితుడు షేక్ సాదిక్ ఖాన్ను పోలీసులు కాకినాడకు తీసుకొచ్చారు. సర్పవరం పోలీస్ స్టేషన్లో విచారణ కొనసాగుతోంది.

ఢిల్లీలో ఆయనను అదుపులోకి తీసుకున్నారు. అక్కడి నుంచి నిన్న రాత్రి 2 గంటలకు సర్పవరం పోలీస్ స్టేషన్కు తీసుకొచ్చారు.

ఎనిమిది మంది సీఐల బృందం నూకరాజు, ఆయన కుమార్తె సౌజన్య రాసిన ఆత్మహత్య నోట్ల ఆధారంగా సాదిక్ ఖాన్ను ప్రశ్నిస్తున్నట్లు తెలుస్తోంది. నూకరాజు కుటుంబ సభ్యుల మరణాలు, అల్లుడు జగదీశ్వర్ రెడ్డి మరణంలో ఆయన పాత్రపై దర్యాప్తు జరుగుతోంది.

విచారణలో సాదిక్ ఖాన్ పొంతనలేని సమాధానాలు ఇస్తున్నట్లు పోలీసు వర్గాలు తెలిపాయి. జగదీశ్వర్ రెడ్డి మరణానికి తనకు సంబంధం లేదని ఆయన చెప్పినట్లు సమాచారం.

ఈరోజు సాయంత్రం నిందితుడిని మ్యాజిస్ట్రేట్ ముందు హాజరుపరిచి రిమాండ్ పిటిషన్ దాఖలు చేసే అవకాశం ఉంది. కాకినాడ జిల్లా SP బిందు మాధవ్ ఈ కేసుపై మీడియా సమావేశం నిర్వహిస్తారు.