విజయవాడ లాకప్ మృతి: సాయికృష్ణ కేసు హెబియస్ కార్పస్ పిటిషన్‌పై హైకోర్టులో నేడు విచారణ

విజయవాడలో జరిగిన గాడే సాయికృష్ణ లాకప్ మృతి కేసులో ఈ రోజు హైకోర్టులో విచారణ జరగనుంది. సాయికృష్ణ తల్లి దాఖలు చేసిన హెబియస్ కార్పస్ పిటిషన్‌పై పోలీసులకు ఇచ్చిన గడువు నేటితో ముగిసింది. ఈ నేపథ్యంలో కోర్టు విచారణ చేపట్టనుంది.

ఈ కేసును దర్యాప్తు చేస్తున్న స్పెషల్ ఇన్వెస్టిగేషన్ టీమ్ (SIT) తన ఛార్జ్ షీట్‌లో మరికొందరిని చేర్చింది. ఇద్దరు కానిస్టేబుళ్లను సస్పెండ్ చేస్తూ కమిషనర్ ఆఫ్ పోలీస్ ఉత్తర్వులు జారీ చేశారు. అయితే, పోలీసులు కేసును పక్కదారి పట్టిస్తున్నారనే అనుమానాలు వ్యక్తమవుతున్నాయి.

సాయికృష్ణ కుటుంబీకుల తరపు న్యాయవాదులు కోర్టుకు సమర్పించిన రిమాండ్ రిపోర్ట్‌లో కీలక అంశాలు విస్మరించినట్లు ఆరోపిస్తున్నారు. అందుకే సీబీఐ విచారణ కోరుతూ మరో పిటిషన్ దాఖలు చేసినట్లు వెల్లడించారు. ఈ పిటిషన్‌పై సోమవారం విచారణ జరగనుంది.

లాకప్ మృతి తర్వాత మృతదేహాన్ని మాయం చేసిన వ్యవహారంలో కీలకంగా వ్యవహరించిన సీఐ నాగరాజు ఇప్పటికే అరెస్టయ్యారు. మరో అనుమానితుడు హెడ్ కానిస్టేబుల్ అశోక్ నాని కోసం SIT గాలిస్తోంది. ఈ కేసు వెలుగులోకి వచ్చినప్పటి నుంచి ఇద్దరూ పరారీలో ఉన్నారు. నోటీసులు జారీ చేసినా వారి నుంచి స్పందన లేదు. వీరిని నిందుతులుగా చేర్చడంతో పాటు సస్పెండ్ కూడా చేశారు. వీరు దొరికితే కేసులో పురోగతి ఉంటుందని SIT అధికారులు భావిస్తున్నారు.

ఈ కేసుపై హైకోర్టు ముందు ఇవాళ పోలీసులు ఏం నివేదించనున్నారనే దానిపై సర్వత్రా ఉత్కంఠ నెలకొంది.