సాయి కృష్ణ మిస్సింగ్ కేసు: దర్యాప్తు ముమ్మరం, మే 24-25న 4 అజ్ఞాత మృతదేహాలు దహనం

విజయవాడ కృష్ణలంక ప్రాంతంలో రౌడీ షీటర్ సాయి కృష్ణ మిస్సింగ్ కేసులో పోలీసులు దర్యాప్తు ముమ్మరం చేశారు. కృష్ణలంక పోలీస్‌స్టేషన్ సిబ్బందిని, టాస్క్‌ఫోర్స్ అధికారులను ప్రశ్నిస్తున్నారు. స్మశాన వాటికలో పనిచేసే వ్యక్తుల వాంగ్మూలాలను కూడా రికార్డ్ చేశారు.

సాయి కృష్ణను పోలీసులు టార్చర్ చేయడంతో మృతి చెందాడని, అతని మృతదేహాన్ని కృష్ణలంక స్మశాన వాటికలో దహనం చేశారని తల్లి విజయలక్ష్మి ఆరోపించారు. ఈ నేపథ్యంలో పోలీసులు దహన రికార్డులను తనిఖీ చేశారు. మే 24, 25 తేదీల్లో నాలుగు గుర్తు తెలియని మృతదేహాలను తీసుకువచ్చి దహనం చేసినట్లు గుర్తించారు. ఆ నాలుగింటిలో సాయి కృష్ణ మృతదేహం ఒకటా అన్న కోణంలో విచారణ సాగుతోంది.

విద్యుత్ దహన వాటిక ఇంచార్జ్ భాషాను పోలీసులు అదుపులోకి తీసుకుని ప్రశ్నిస్తున్నారు. ఆయనతోపాటు స్వర్గపురి కార్యాలయ ఇంచార్జ్ రవి, మున్సిపల్ కార్పొరేషన్ కార్మికుల నుంచి కూడా వాంగ్మూలాలు సేకరించారు. మే 23 అర్ధరాత్రి రెండు అజ్ఞాత మృతదేహాలను పోలీసులు స్వర్గపురికి తీసుకొచ్చినప్పుడు సిబ్బందితో వాగ్వాదం జరిగింది, చివరకు 24న దహనం జరిగినట్లు తెలుస్తోంది.

ఈ కేసు దర్యాప్తు కోసం రాజమండ్రి ఎస్పి నరసింహ కిషోర్ నేతృత్వంలో ప్రత్యేక బృందం విచారణ చేపట్టింది. ఇందులో ఏఎస్పీ దైవప్రసాద్ టీం కీలకంగా వ్యవహరిస్తోంది. సాయి కృష్ణను మార్కాపురం నుంచి విజయవాడకు టాస్క్‌ఫోర్స్ పోలీసులే తీసుకొచ్చారన్న ఆరోపణల నేపథ్యంలో టాస్క్‌ఫోర్స్ అధికారులను, కృష్ణలంక పోలీస్ స్టేషన్‌లో డ్యూటీలో ఉన్న సిబ్బందిని ప్రశ్నిస్తున్నారు. కాల్ డేటా, సీసీటీవీ ఫుటేజీ, ఇతర డిజిటల్ ఆధారాలను పరిశీలిస్తున్నారు. సంఘటన జరిగిన సమయంలో ఎవరికి ఎవరు ఫోన్ చేశారు, ఏ ఆదేశాలు జారీ అయ్యాయి అన్న వివరాలపై దర్యాప్తు కొనసాగుతోంది.

పోలీసులు మున్సిపాలిటీ, పోలీస్ స్టేషన్ రికార్డులను క్షుణ్ణంగా పరిశీలిస్తున్నారు. సాయి కృష్ణ మిస్సింగ్ వెనుక ఉన్న నిజాలు వెలికి తీసేందుకు దర్యాప్తు బృందం శ్రమిస్తోంది.