సాయికృష్ణ మృతి కేసులో సిట్ విచారణ: పోలీస్ స్టేషన్ సిబ్బంది వాంగ్మూలాలు నమోదు
సాయి కృష్ణ మృతి కేసు దర్యాప్తులో భాగంగా SIT అధికారులు కృష్ణలంక పోలీస్ స్టేషన్లోని సిబ్బంది అందరినీ విచారించారు. వారి వాంగ్మూలాలు నమోదు చేశారు.
పోలీస్ స్టేషన్ సెక్షన్ ఇన్చార్జ్ నాగరాజు, హెడ్ కానిస్టేబుల్ సత్యనారాయణలను సిట్ ప్రశ్నించింది. వీరిద్దరూ కేసులో నిందితుడైన సీఐ నాగరాజుతో సన్నిహితంగా ఉన్నట్లు తెలుస్తోంది. ఇప్పటికే ఈ కేసులో నలుగురిని నిందితులుగా చేర్చారు. హెడ్ కానిస్టేబుల్ బాబూరావు సిట్ అదుపులో ఉన్నారు.
సీఐ నాగరాజు సన్నిహితుడైన సురేష్ నుంచి కీలక వివరాలు రాబట్టినట్లు సిట్ తెలిపింది. ఆ వివరాలతో దర్యాప్తు ముందుకు సాగుతోంది. మృతదేహాన్ని ఎక్కడ పడేశారన్నది ప్రధాన ప్రశ్నగా మారింది.
కృష్ణలంక స్మశానవాటికతో పాటు నగరంలోని ఇతర స్మశానవాటికల్లో రికార్డులు, అనాధ శవాల దహనం, సీసీ కెమెరాల ఫుటేజీని పరిశీలించారు. ఎక్కడా కీలక ఆధారాలు లభించలేదని తెలిసింది. సిబ్బంది వాంగ్మూలాలపై లోతైన పరిశీలన జరుగుతోంది.
అనుమానితులైన వారిని మళ్లీ పిలిచి వారి స్టేట్మెంట్లను రూఢీ చేస్తున్నారు. ఒకటి రెండు రోజుల్లో మరికొందరిని నిందితులుగా చేర్చే అవకాశం ఉందని సమాచారం.
వార్త ఆధారాలు: పబ్లిక్ న్యూస్ బ్రాడ్కాస్ట్లు, అధికారిక అప్డేట్లు, ఉషా కిరణం ఎడిటోరియల్ ప్రమాణాలు.
సవరణల కోసం సంప్రదించండి: help@ushakiranam.com
