రాజస్థాన్‌లో ఇసుక తుఫాన్: చురు జిల్లాలో దృశ్యమానత సున్నా, ట్రాఫిక్‌కు అంతరాయం

రాజస్థాన్ రాష్ట్రంలోని చురు జిల్లాలో భారీ ఇసుక తుఫాన్ సంభవించింది. మధ్యాహ్నం సూర్యుడు మండుతున్న సమయంలో ఒక్కసారిగా ఇసుక మేఘాలు దూసుకురావడంతో పగలు కాస్తా చీకటిలా మారింది.

బలమైన గాలులు ఇసుకను వందల అడుగుల ఎత్తుకు లేపడంతో దృశ్యమానత (విజిబిలిటీ) పూర్తిగా సున్నాకు పడిపోయింది. రోడ్లపై ఉన్న వాహనదారులు తమ వాహనాలను అక్కడికక్కడే నిలిపివేశారు. హెడ్‌లైట్లు, ఇండికేటర్లు వెలిగించినా ఉపయోగం లేకుండా పోయింది.

ఈ తుఫాన్ కారణంగా చెట్లు విరిగిపడ్డాయి, విద్యుత్ స్తంభాలు కూలి కరెంటు సరఫరా నిలిచిపోయింది. కొన్ని ఇళ్ళపై రేకులు, షీట్లు ఎగిరిపోయాయి. అధికారులు ప్రాథమికంగా తెలిపిన వివరాల ప్రకారం ప్రాణనష్టం మాత్రం జరగలేదు.

తుఫాన్ తగ్గిన తర్వాత రోడ్లపై ఇసుక దిబ్బలు ఏర్పడ్డాయి. మున్సిపల్ సిబ్బంది ఇసుకను తొలగించి రాకపోకలను పునరుద్ధరించారు. పర్యావరణ నిపుణులు మాట్లాడుతూ ఈసారి తుఫాను తీవ్రత ఎక్కువగా ఉందని, గ్లోబల్ వార్మింగ్ ప్రభావంతో వాతావరణంలో వస్తున్న మార్పులకు ఇది సంకేతమని హెచ్చరించారు.