ఆంధ్రప్రదేశ్‌లో ‘సంజీవని’ డిజిటల్ ఆరోగ్య వ్యవస్థ ప్రారంభం; 42 రకాల పరీక్షలు ఉచితం

ముఖ్యమంత్రి చంద్రబాబు నాయుడు ప్రకాశం జిల్లా గిద్దలూరు మండలం కృష్ణం శెట్టిపల్లి గ్రామంలో సంజీవని డిజిటల్ సర్వే సెంటర్ ను ప్రారంభించారు. ఆగస్టు 15 నుంచి ఈ ప్రాజెక్ట్ ను రాష్ట్రవ్యాప్తంగా అమలు చేస్తామని ఆయన తెలిపారు.

సంజీవని ప్రాజెక్ట్ కింద రాష్ట్రంలో 72 లక్షల మందికిపైగా ప్రజలకు భారీ స్థాయిలో స్క్రీనింగ్ నిర్వహిస్తారు. గ్రామ, వార్డు సచివాలయాల స్థాయిలో 42 రకాల వైద్య పరీక్షలు ఉచితంగా చేస్తారు. రోగుల పూర్వ మెడికల్ రికార్డులు, టెస్ట్ రిపోర్ట్లు, ప్రిస్క్రిప్షన్లు అన్నీ ఒకే మొబైల్ యాప్ లో డిజిటల్ హెల్త్ ప్రొఫైల్ గా మారుస్తారు. ఈ రికార్డులు ప్రాథమిక ఆరోగ్య కేంద్రాల నుంచి పెద్ద ఆసుపత్రుల వరకు లింక్ అయి ఉండటంతో, ఏ ఆసుపత్రిలో అయినా డాక్టర్ ఒకే క్లిక్ తో పాత చరిత్రను చూడగలరు.

బిల్ అండ్ మిలిండా గేట్స్ ఫౌండేషన్, టాటా కన్సల్టెన్సీ సర్వీసెస్ సహకారంతో ఈ వ్యవస్థను AI సాంకేతికతతో అభివృద్ధి చేశారు. AI ప్రతి వ్యక్తి ఆరోగ్యాన్ని విశ్లేషించి పర్సనల్ హెల్త్ స్కోర్ ఇస్తుంది, అవసరమైన ఆరోగ్య సలహాలు కూడా అందిస్తుంది. రోగులు యాప్ ద్వారా డాక్టర్ అపాయింట్మెంట్ బుక్ చేసుకోవచ్చు.

రాష్ట్రంలో జరిగిన సమగ్ర ఆరోగ్య సర్వే ప్రకారం 80% మంది కేవలం 10 రకాల ఆరోగ్య సమస్యలతో బాధపడుతున్నారు. అందుకే ఈ ప్రాజెక్ట్ ప్రధానంగా హై బీపీ, గుండె వ్యాధులు, కిడ్నీ, ఊపిరితిత్తుల సమస్యలు, క్యాన్సర్, లివర్, నాడీ సమస్యలు, జీవనశైలి వ్యాధులు, రక్తహీనత వంటి 10 అంశాలపై దృష్టి సారిస్తుంది. కుప్పంలో పైలట్ ప్రాజెక్ట్ విజయవంతం కావడంతో, ఆగస్టు 15 నుంచి రాష్ట్రవ్యాప్తంగా అమలు చేసేందుకు ప్రభుత్వం సిద్ధమైంది.