Sarkar Express రైల్లో చోరీ ప్రయత్నం: పోలీసులు 9 రౌండ్ల కాల్పులు

బాపట్ల జిల్లా అబ్బికట్ల సమీపంలో సర్కార్ ఎక్స్‌ప్రెస్ రైల్లో అర్ధరాత్రి దొంగతనానికి ప్రయత్నం జరిగింది. చెంగల్పట్టు నుంచి కాకినాడ వెళ్తున్న ఈ రైల్లో కొందరు దొంగలు మహిళా ప్రయాణికురాలి మెడలో నగలు లాక్కోవడానికి ప్రయత్నించారు.

ప్రయాణికులు అప్రమత్తమై గట్టిగా కేకలు వేయడంతో దొంగలు చైన్ లాగి పారిపోయేందుకు ప్రయత్నించారు. రైల్వే ఎస్కార్ట్ పోలీసు కానిస్టేబుల్ వెంటనే స్పందించి, పారిపోతున్న దొంగలపై తన ఎస్‌ఎల్‌ఆర్ ఆయుధంతో 9 రౌండ్ల కాల్పులు జరిపారు.

చీకటిని ఆసరాగా చేసుకున్న దొంగలు పొలాల్లోకి పారిపోయారు. ఘటనా స్థలంలో రెండు బ్యాగులు లభ్యమయ్యాయి, కానీ వాటిలో ఆధారాలు లేవని డీఎస్పీ అక్కేశ్వరరావు తెలిపారు. దొంగలు 6 నుంచి 8 మంది ఉండవచ్చని ఆయన అంచనా వేశారు.

దొంగలను పట్టుకునేందుకు 5 ప్రత్యేక బృందాలు ఏర్పాటు చేసి గాలింపు చేపట్టామని డీఎస్పీ వివరించారు. తోటలు, వ్యవసాయ భూములు గాలిస్తున్నట్టు చెప్పారు. ఇప్పటివరకు ఎవరికి గాయాలు కాలేదని, నిందితులకు హెచ్చరించామని, పోలీసులు కాల్పులు జరిపేందుకు సిద్ధంగా ఉన్నామని డీఎస్పీ హెచ్చరించారు.