మహబూబ్‌నగర్‌లో సర్పంచ్ చొరవ: ప్రభుత్వ పాఠశాలలో చేరికలు 98 నుంచి 138కు పెరిగాయి

మహబూబ్‌నగర్ జిల్లా రుద్రారం గ్రామంలో సర్పంచ్ రవీందర్ చొరవతో ప్రభుత్వ ప్రాథమిక పాఠశాలలో విద్యార్థుల సంఖ్య 98 నుంచి 138కు పెరిగింది.

తమ పిల్లలను ప్రభుత్వ పాఠశాలలో చేర్పించే తల్లిదండ్రుల ఇంటి పన్నును ఐదేళ్లపాటు తానే భరిస్తానని సర్పంచ్ ప్రకటించడంతో ఈ పెరుగుదల సాధ్యమైంది. తక్కువ ఆదాయం ఉన్న కుటుంబాలు ప్రైవేట్ స్కూళ్ల ఫీజులు కట్టలేక ఇబ్బంది పడుతుండడం గమనించి, ప్రైవేట్ బదులు ప్రభుత్వ బడిలో చేర్పించాలని సర్పంచ్ సూచించారు.

పాఠశాల ప్రధానోపాధ్యాయులు సర్పంచ్‌తో కలిసి ఇంటింటా తిరిగి, ప్రభుత్వ పాఠశాలలో ఉచిత పాఠ్యపుస్తకాలు, యూనిఫామ్లు, మధ్యాహ్న భోజనం, డిజిటల్ విద్య వంటి సౌకర్యాలను వివరించారు. ప్రైవేట్‌కు దీటుగా బోధన ఇస్తామని, ఒక సంవత్సరం పంపించి చూడాలని తల్లిదండ్రులను కోరారు.

సర్పంచ్, ఉపాధ్యాయులు సొంత డబ్బుతో స్కూల్ గేటు, బాత్రూమ్ల మరమ్మత్తులు, నీటి పైప్‌లైన్ వంటి మౌలిక వసతులు కల్పించారు. ఇలాంటి చొరవ ఇతర గ్రామ సర్పంచులు తీసుకుంటే ప్రభుత్వ పాఠశాలలకు పూర్వ వైభవం వస్తుందని సర్పంచ్ రవీందర్ ఆశాభావం వ్యక్తం చేశారు.