వెద పద్ధతి వరిలో కలుపు నివారణకు శాస్త్రవేత్తల సూచనలు

నేరుగా వెదజల్లిన వరిలో కలుపు సమస్య తీవ్రమవుతోంది. కూలీల కొరత, సాగు ఖర్చు తగ్గింపు కారణంగా రైతులు ఈ పద్ధతిని ఎంచుకుంటున్నారు. ఉత్తరకోస్తా ప్రాంతంలో ఈ ఖరీఫ్‌లో చాలా మంది రైతులు వెద పద్ధతిని అవలంబించారు. ప్రస్తుతం వరి 10 నుండి 30 రోజుల దశలో ఉంది. కలుపు నివారణపై శ్రీకాకుళం రాగోలు వ్యవసాయ పరిశోధన స్థానం సీనియర్ శాస్త్రవేత్త డాక్టర్ డి. శేఖర్ రైతులకు సూచనలు అందించారు.

విత్తనం వెదజల్లిన మొదటి 1-3 రోజుల్లోపు ప్రెటిలాక్లోర్ అనే కలుపు మందును ఎకరానికి 400-500 మి.లీ. చొప్పున సమానంగా పిచికారి చేయాలి. ఇది తొలి దశ కలుపును నివారిస్తుంది. ఒకవేళ మొదట్లో మందు వేయకపోతే 10 రోజులకు పైరోజోసల్ఫురాన్ ఇథైల్ 100 మి.లీ./ఎకరా పిచికారి చేసి 20-30 రోజుల వయసు దాకా కలుపు అదుపు చేయవచ్చు.

15 రోజుల దశలో గడ్డి జాతి కలుపు ఎక్కువగా కనిపిస్తే సైహలోపాబ్యుటైల్ 400 మి.లీ./ఎకరా (లీటరు నీటికి 2 మి.లీ. చొప్పున) పిచికారి చేయాలి. వెడల్పాటి ఆకులు, తుంగ వంటి కలుపు ఉంటే బిస్పైరిబాక్ సోడియం 80-100 మి.లీ./ఎకరా వాడాలి. అన్ని రకాల కలుపు ఒకేసారి ఉంటే 20-30 రోజుల దశలో ఆల్‌మిక్స్ 8 గ్రా./ఎకరా పిచికారి చేస్తే సరిపోతుంది.

25-30 రోజుల తర్వాత కేవలం వెడల్పాటి ఆకు కలుపు మాత్రమే ఉంటే 2,4-D సోడియం సాల్ట్ 400 గ్రా./ఎకరా (లీటరుకు 2 గ్రా.) వాడాలని శేఖర్ సూచించారు. 30 రోజులు దాటిన తర్వాత రసాయన కలుపు మందులతో ప్రయోజనం ఉండదు. అప్పుడు మనుషులతో కలుపు తీయించడమే మేలు. సకాలంలో ఈ యాజమాన్యం పాటిస్తే ఆశించిన దిగుబడి సాధించవచ్చని ఆయన వివరించారు.

వెద పద్ధతిలో ఎకరానికి 15-20 కిలోల విత్తనం ఆదా అవుతుంది. పంట కోతకు 7-10 రోజులు ముందుకొస్తుంది. కూలీలు, నారు పెంపకం లేకపోవడంతో ఎకరాకు రూ.2500-3000 ఖర్చు తగ్గుతుంది. మొక్కల సాంద్రత వల్ల దిగుబడి 10-15% పెరిగే అవకాశముంది.