షబ్బీర్ అలీ ఆడియో లీక్: గాంధీ భవన్‌లో క్రమశిక్షణ విచారణ ప్రారంభం

టీపీసీసీ క్రమశిక్షణ కమిటీ చైర్మన్ మల్లు రవి ఆధ్వర్యంలో షబ్బీర్ అలీ ఆడియో లీక్ వివాదంపై గాంధీ భవన్‌లో విచారణ ప్రారంభమైంది. కమిటీ ముందు షబ్బీర్ అలీ, ఆయనపై ఫిర్యాదు చేసిన ఇందుప్రియ హాజరయ్యారు.

కొన్ని రోజుల క్రితం ఒక ఆడియో క్లిప్ సోషల్ మీడియాలో వైరల్ అయింది. అందులో పీసీసీ చీఫ్ మహేశ్ కుమార్ గౌడ్, కాంగ్రెస్ పార్టీ ఆర్థిక వ్యవహారాలపై వివాదాస్పద వ్యాఖ్యలు ఉన్నాయి. ఈ ఆడియో తనది కాదని, తన ప్రతిష్ట దెబ్బతీసేందుకు కుట్ర జరుగుతోందని షబ్బీర్ అలీ ఖండించారు. ఆడియోను ఏఐ టెక్నాలజీతో సృష్టించారని ఆరోపిస్తూ, దీనిపై ఫోరెన్సిక్ పరీక్షలు చేయించాలని డిమాండ్ చేశారు. షబ్బీర్ అలీ వర్గం జిల్లా ఎస్పీకి ఫిర్యాదు చేసింది.

మరోవైపు, షబ్బీర్ అలీ వ్యాఖ్యలు మహిళల్ని, పీసీసీ అధ్యక్షుడిని కించపరిచేలా ఉన్నాయంటూ పీసీసీ ప్రధాన కార్యదర్శి గడ్డం చంద్రశేఖర్ రెడ్డి భార్య ఇందుప్రియ ఫిర్యాదు చేశారు. షబ్బీర్ అలీ వర్గీయులు తనపై అసభ్యకర ప్రచారం చేస్తున్నారని ఆమె ఆరోపించారు. ఈ ఫిర్యాదు మేరకు 20 మంది షబ్బీర్ అలీ వర్గీయులపై కేసు నమోదైంది.

క్రమశిక్షణ కమిటీ చైర్మన్ మల్లు రవి మాట్లాడుతూ, కామారెడ్డి జిల్లాలో షబ్బీర్ అలీ, చంద్రశేఖర్ రెడ్డిల మధ్య ఉన్న వివాదాన్ని ఈ రోజు పూర్తిగా పరిష్కరిస్తామని తెలిపారు. ఇద్దరినీ కూర్చోబెట్టి మాట్లాడిన తర్వాత సమస్యకు ముగింపు పలికే అవకాశం ఉందన్నారు. ప్రస్తుతం షబ్బీర్ అలీతో సమావేశం కొనసాగుతోంది. ఆయన వివరణ తర్వాత ఇందుప్రియ వాదన కూడా వినబోతున్నట్లు మల్లు రవి స్పష్టం చేశారు.