శీతలాష్టమి: జ్యేష్ఠ మాసంలో పిల్లల రక్షణ కోసం ప్రత్యేక పూజలు, ఆచారాలు

జ్యేష్ఠ మాసంలో కృష్ణ పక్ష అష్టమి రోజును శీతలాష్టమిగా జరుపుకుంటారు. ఈ రోజున చిన్నారులకు వ్యాధులు రాకుండా అమ్మవారిని ప్రత్యేకంగా పూజించడం ఆనవాయితీ.

వేసవి నుంచి వర్షాకాలానికి మారే సంధి సమయంలో పిల్లలకు అత్యుష్ణం, గొంతు వ్యాధులు వంటి ఇబ్బందులు ఎదురవుతాయని భక్తులు నమ్ముతారు. ఈ పూజల వల్ల అలాంటి వ్యాధుల నుంచి రక్షణ లభిస్తుందని విశ్వాసం.

శీతలాష్టమి రోజున శివుడికి పాలు, పెరుగుతో అభిషేకం చేస్తారు. అమ్మవారికి పెరుగు-పంచదార మిశ్రమాన్ని నైవేద్యంగా పెట్టి, దాన్ని పిల్లలకు ఇస్తారు. రాగి చెంబులో మజ్జిగ లేదా నీళ్లు పోసి, అందులో రావి ఆకులు, వేప ఆకులు, మామిడి ఆకులు, తమలపాకులు వంటి పత్రాలను వేస్తారు.

ఆ చెంబును ఇంటి ఈశాన్య భాగంలో ఉంచి, కొద్దిగా పసుపు కలిపి కుటుంబం ఆరాధించే అమ్మవారికి నమస్కరిస్తారు. సాయంత్రం ఈ మిశ్రమాన్ని పూల మొక్కల మధ్య నిమజ్జనం చేస్తారు. ఉత్తర భారతదేశంలో శీతలా దేవిని చీపురు, చేటతో ఉగ్ర రూపంలో పూజిస్తారు. ఆ అమ్మవారు ఇంటిలోని రోగాలను, క్షుద్రశక్తులను ఊడ్చివేస్తుందని నమ్ముతారు.

జ్యేష్ఠ అష్టమి చంద్రుని అమృత కిరణాలకు ప్రత్యేకమైనదని జ్యోతిషం చెబుతోంది. ఈ కాలంలో వాతావరణం బయటకు చల్లగా ఉండి లోపల వేడి నింపుకుంటుంది. పిల్లల ఆరోగ్యం కోసం ఈ పూజా విధానాన్ని భక్తులు పాటిస్తారు.