భీమవరంలో శివాజీ మహారాజ్ పట్టాభిషేక దినోత్సవం సందర్భంగా బైక్ ర్యాలీ

భీమవరంలో ఛత్రపతి శివాజీ మహారాజ్ పట్టాభిషేక దినోత్సవం సందర్భంగా ఆర్ఎస్ఎస్ ఆధ్వర్యంలో బైక్ ర్యాలీ నిర్వహించారు. ఈ కార్యక్రమంలో కేంద్ర మంత్రి శ్రీనివాస్ వర్మ, రాజ్యసభ సభ్యులు పాకా సత్యనారాయణ పాల్గొన్నారు. వారు శివాజీ మహారాజ్ చిత్రపటానికి నివాళులు అర్పించి, ర్యాలీని ప్రారంభించారు.

కేంద్ర మంత్రి శ్రీనివాస్ వర్మ మాట్లాడుతూ, శివాజీ మహారాజ్ యుద్ధరంగంలోనే కాకుండా పరిపాలనలోనూ దూరదృష్టి కలిగిన నాయకుడని కొనియాడారు. ఆయన రైతుల సంక్షేమం, మహిళల గౌరవం కోసం చేసిన కృషి నేటికీ ఆదర్శనీయమని చెప్పారు.

రాజ్యసభ సభ్యులు పాకా సత్యనారాయణ మాట్లాడుతూ, ప్రపంచ చరిత్రలో ఎందరో రాజులు ఉన్నా శివాజీనే మహారాజుగా గుర్తింపు పొందారని అన్నారు. పలు విదేశీ సామ్రాజ్యాలు దేశంపై దాడి చేసిన కాలంలో, అతి తక్కువ సైన్యంతో శివాజీ హిందూ సామ్రాజ్యం స్థాపించారని తెలిపారు. ప్రధాని మోదీ నాయకత్వంలో అమలవుతున్న సబ్కా సాథ్, సబ్కా వికాస్, సబ్కా విశ్వాస్ పథకాలలో శివాజీ పాలన లక్ష్యాలు ప్రతిఫలిస్తున్నాయని ఆయన అభిప్రాయపడ్డారు.