సింగరేణిలో అధికారుల రిలే నిరాహార దీక్ష: ప్రమోషన్ పాలసీ అమలుకు డిమాండ్

సింగరేణి కాలరీస్ కంపెనీ ఆఫీసర్ల సంఘం ఆధ్వర్యంలో ఆదివారం పెద్దపల్లి జిల్లా గోదావరిఖనిలో రిలే నిరాహార దీక్ష ప్రారంభమైంది. సింగరేణి వ్యాప్తంగా ఈ ఆందోళన కార్యక్రమం జరుగుతోంది.

అధికారులు తమ డిమాండ్లను ప్రస్తావించారు. ప్రమోషన్ పాలసీని పారదర్శకంగా అమలు చేయాలని, వేతనాల అప్‌గ్రేడేషన్, పీఆర్సీ అమలు చేపట్టాలని కోరారు. సింగరేణికి ప్రభుత్వం నుంచి రావాల్సిన బకాయిలను వెంటనే విడుదల చేయాలని డిమాండ్ చేశారు. కోల్ ఇండియాలో అమలవుతున్న కొన్ని విధానాలను సింగరేణిలోనూ అమలు చేయాలని కోరారు.

జూనియర్ ఆఫీసర్లు నెలకు దాదాపు రూ.40,000 వరకు వేతన నష్టాన్ని ఎదుర్కొంటున్నారని అధికారులు తెలిపారు. ఈ సమస్యలు వెంటనే పరిష్కరించాలని యాజమాన్యాన్ని కోరారు.