SIR 2026: BLO ఇచ్చే ఎన్యుమరేషన్ ఫారంలో నింపాల్సిన వివరాలు ఇవే

స్పెషల్ సమ్మరీ రివిజన్ (SIR) 2026 సందర్భంగా BLO అందించే ఎన్యుమరేషన్ ఫారంలో నింపాల్సిన వివరాల గురించి అధికారులు వివరించారు. ఈ ఫారంలో మొత్తం నాలుగు నుండి అయిదు భాగాలు ఉంటాయి.

మొదటి భాగంలో ఓటరు పేరు, EPIC నంబర్, చిరునామా వివరాలు ముందే నింపబడి వస్తాయి. అదే విధంగా నియోజకవర్గం పేరు, నంబర్, పోలింగ్ స్టేషన్ పేరు, నంబర్, సీరియల్ నంబర్ కూడా ముందే ముద్రించి వస్తాయి. మూడవ బాక్స్‌లో ప్రతి ఓటరుకు విడిగా QR కోడ్ ఉంటుంది. ప్రస్తుత ఓటరు జాబితాలో ఉన్న ఫోటో ముద్రించబడుతుంది. దానితో పాటు తాజా ఫోటో అతికించడానికి కూడా అవకాశం కల్పించారు.

రెండవ భాగంలో 2002 ఓటరు జాబితా వివరాలు అడుగుతారు. ఓటరు పేరు 2002 జాబితాలో ఉంటే మొదటి బాక్స్‌లో నింపాలి. 2002 జాబితాలో పేరు లేనట్లయితే తల్లిదండ్రులు లేదా తాతామామల వివరాలు రెండవ బాక్స్‌లో నింపాలి.

మూడవ భాగంలో ఓటరు మొబైల్ నంబర్, ఆధార్ నంబర్ (ఐచ్ఛికం), తండ్రి పేరు, తండ్రి EPIC నంబర్, తల్లి పేరు, తల్లి EPIC నంబర్, వివాహమైతే భాగస్వామి పేరు, భాగస్వామి EPIC నంబర్ వివరాలు నింపాలి.

నాల్గవ భాగంలో డిక్లరేషన్ ఉంటుంది. తాను లేదా తన కుటుంబంలో ఎవరూ వేరే నియోజకవర్గంలో గాని, అదే నియోజకవర్గంలో రెండు చోట్ల గాని ఎన్యుమరేషన్ ఫారం ఇవ్వలేదని ధృవీకరించాలి. ప్రజా ప్రాతినిధ్య చట్టం 1950 సెక్షన్ 31 ప్రకారం ఉల్లంఘన చేస్తే ఒక సంవత్సరం జైలు శిక్ష లేదా జరిమానా లేదా రెండూ విధించబడతాయి. ఓటరు స్వయంగా సంతకం చేయాలి. ఓటరు అందుబాటులో లేనట్లయితే కుటుంబంలో పెద్ద సభ్యుడు సంతకం చేయవచ్చు.