సాయికృష్ణ కస్టోడియల్ డెత్: సీఐ నాగరాజు కస్టడీకి SIT పిటిషన్

సాయికృష్ణ కస్టోడియల్ డెత్ కేసులో కీలక పరిణామం. సీఐ నాగరాజును 12 రోజుల పాటు కస్టడీకి ఇవ్వాలని SIT అధికారులు గురువారం న్యాయస్థానంలో పిటిషన్ దాఖలు చేశారు. ఇప్పటికే ఈ కేసులో నాగరాజును అరెస్టు చేసి, రాజమండ్రి సెంట్రల్ జైలుకు తరలించారు. అతనికి వచ్చే నెల 8వ తేదీ వరకు రిమాండ్ విధించారు.

అయితే సాయికృష్ణ మృతదేహం ఆచూకీ ఇంకా తెలియరాలేదు. మృతదేహం ఏమైందనేది మిస్టరీగా మిగిలింది. మృతదేహాన్ని భద్రపరిచారా, దహనం చేశారా లేదా పూడ్చిపెట్టారా అనే అనుమానాలు వ్యక్తమవుతున్నాయి. ఈ నేపథ్యంలో నాగరాజును కస్టడీకి తీసుకోవాలని SIT కోరింది. అరెస్టు సమయంలో పది గంటల పాటు విచారించినా నాగరాజు సహకరించలేదని SIT తెలిపింది.

SIT తన రిమాండ్ రిపోర్టులో, నాగరాజు ఒక్కడే కాకుండా మరి కొందరు సిబ్బంది కూడా ఈ ఘటనలో సహాయం చేసి ఉండొచ్చని పేర్కొంది. కస్టడీకి తీసుకుంటే మృతదేహం జాడతో పాటు, సహకరించిన వారిని గుర్తించే అవకాశం ఉంటుంది. ఈ పిటిషన్‌పై గురువారం విచారణ జరిగే అవకాశం ఉన్నట్టు తెలుస్తోంది.