వికారాబాద్‌లో కేజీబీవీ పాఠశాల, ఇందిరమ్మ ఇళ్లను ప్రారంభించిన స్పీకర్ గడ్డం ప్రసాద్

తెలంగాణ శాసనసభ స్పీకర్ గడ్డం ప్రసాద్ కుమార్ వికారాబాద్ జిల్లా కోటపల్లి మండలం కరీంపూర్ గ్రామంలో నూతనంగా నిర్మించిన కస్తూర్బా గాంధీ బాలికా విద్యాలయాన్ని (కేజీబీవీ) ప్రారంభించారు. ఆయన బార్వాద్, మోతుకుపల్లి గ్రామాల్లో ఇందిరమ్మ ఇళ్ల ప్రారంభోత్సవంలో కూడా పాల్గొన్నారు.

ఈ కార్యక్రమంలో యువత డ్రగ్స్‌కు దూరంగా ఉండాలని, మాదకద్రవ్యాల మాయలో పడి భవిష్యత్తును నాశనం చేసుకోవద్దని స్పీకర్ విద్యార్థులకు సూచించారు.

పేద, బడుగు, బలహీన వర్గాల ఆడపిల్లల విద్య కోసం దివంగత ముఖ్యమంత్రి వై.ఎస్. రాజశేఖర్ రెడ్డి కేజీబీవీ పాఠశాలలను ప్రారంభించారని స్పీకర్ గుర్తుచేశారు. అనాథలు, తల్లిదండ్రులు లేని చిన్నారులకు ఈ పాఠశాలల్లో ప్రవేశం కల్పిస్తున్నామని తెలిపారు.

కొత్తగా ప్రారంభించిన కేజీబీవీ పాఠశాలలో నైపుణ్యం కలిగిన ఉపాధ్యాయులు ఉన్నారని, ఫలితాలు మెరుగ్గా ఉన్నాయని స్పీకర్ అభిప్రాయపడ్డారు. ప్రస్తుత ప్రభుత్వం విద్య, ఆరోగ్య రంగాలకు అధిక ప్రాధాన్యత ఇస్తోందని ఆయన పేర్కొన్నారు. విద్యార్థులు చదువుపై దృష్టిపెట్టి ఉన్నత స్థాయికి చేరుకోవాలని సూచించారు.