శ్రీశైలం దేవాలయంలో భక్తుల రద్దీ భారీగా పెరిగినట్లు అధికారులు వెల్లడి

నంద్యాల జిల్లా శ్రీశైలం ద్వాదశ జ్యోతిర్లింగ క్షేత్రంలో భక్తుల రద్దీ గణనీయంగా పెరిగిందని ఆలయ అధికారులు తెలిపారు.

ప్రధానమంత్రి నరేంద్ర మోదీ ఇటీవల ఇక్కడ దర్శనం చేసుకున్న తర్వాత భక్తుల సంఖ్య చాలా ఎక్కువైందని వారు చెప్పారు. ప్రస్తుతం రోజుకు సుమారు 10 వేల నుంచి 20 వేల మంది వరకు అన్నప్రసాదం స్వీకరిస్తున్నట్లు అధికారులు వెల్లడించారు.

భక్తులకు ఎటువంటి ఇబ్బంది లేకుండా నిరంతరం అన్నప్రసాదం అందజేస్తున్నామని, సేవలను విస్తరించామని వారు తెలిపారు. ఆలయంలో ప్రతి అడుగుకూ తాగునీటి సౌకర్యం కల్పించామని, వేసవి దృష్ట్యా ఈ ఏర్పాటు చేశామని పేర్కొన్నారు.

దర్శనం అనంతరం భక్తులకు ఉచితంగా పాలు, బిస్కెట్లు కూడా అందిస్తున్నారు. ఈ విధంగా తిరుమల తరహాలోనే సేవలు అందుతున్నాయని ఓ భక్తుడు పోల్చాడు. అన్నప్రసాదంలో రైస్, పప్పు, చట్నీ, కర్రీ, సాంబార్, స్వీటు వంటి అన్ని పదార్ధాలు కూడా ఇంటి వంటలా ఉండి నాణ్యంగా ఉన్నాయని పలువురు భక్తులు సంతృప్తి వ్యక్తం చేశారు.