SRSP కాకతీయ కాలువ శిథిలం: 3 లక్షల ఎకరాలకు సాగునీటి సంక్షోభం

SRSP ప్రాజెక్టు కాకతీయ ప్రధాన కాలువ లైనింగ్ గతేడాది భారీ వర్షాలకు దెబ్బతిన్నది. దీంతో ఉమ్మడి వరంగల్, సూర్యాపేట జిల్లాల్లోని 3 లక్షల ఎకరాల ఆయకట్టుకు సాగునీరు అందక ప్రశ్నార్థకంగా మారింది.

128 కిలోమీటర్ల పొడవైన ఈ కాలువకు 18 ఉపకాల్వలు ఉన్నాయి. భారీ వరదల వల్ల రాయపర్తి, గీసుకొండ, తొర్రూరు, భూపాలపల్లి జిల్లాలోని రేగొండ, గోరి కొత్తపల్లి, చిట్యాల, టేకుమట్ల తదితర ప్రాంతాల్లో లైనింగ్ పూర్తిగా దెబ్బతిన్నది. కాలువలో చెట్లు, పొదలు పెరగడంతో నీరు ప్రవహించకుండా ఆటంకం ఏర్పడింది. 50% వరకు నీరు వృధా అవుతోందని అధికారులు గతంలో నిర్ధారించారు.

రైతులు తీవ్ర ఆందోళన వ్యక్తం చేస్తున్నారు. ప్రతి ఏటా వేసవికాలంలో మరమ్మత్తులకై నిధులు కేటాయించినప్పటికీ పనులు పూర్తి కావడం లేదని, అధికారులు నిర్లక్ష్యం చేశారని ఆరోపిస్తున్నారు. ఖరీఫ్ సీజన్ సమీపిస్తున్న నేపథ్యంలో వర్షాలు కురిసినా పంటలకు నీరు అందే పరిస్థితి లేదని ఆవేదన వ్యక్తం చేస్తున్నారు.

కాల్వల్లో చేరిన చెట్లను తొలగించి, దెబ్బతిన్న లైనింగును వెంటనే మరమ్మత్తు చేయాలని, సాగునీరు నిరంతరాయంగా అందేలా చూడాలని రైతులు డిమాండ్ చేస్తున్నారు. ఈ విషయంలో నీటిపారుదల శాఖ అధికారుల స్పందన ఇంకా తెలియాల్సి ఉంది.