కర్నూలు జిల్లాలో ఒకే టీచర్‌తో ప్రభుత్వ స్కూల్, విద్యార్థుల ఆందోళన

కర్నూలు జిల్లా నందవరం మండలం హాలహరివి గ్రామంలోని ప్రభుత్వ ప్రాథమిక పాఠశాలలో 150 మంది విద్యార్థులకు ఒకే ఒక ఉపాధ్యాయుడు ఉన్నారు. ఆ ఉపాధ్యాయుడు అనారోగ్యంతో సెలవులో ఉన్న నేపథ్యంలో విద్యార్థులు స్కూల్ ఎదుట నిరసన తెలిపారు.

ఒకే టీచర్ కూడా లేకపోవడంతో విద్యార్థులు 'మమ్మల్ని చదువుకోనివ్వండి, టీచర్లను నియమించండి' అంటూ ఆందోళన చేపట్టారు. తల్లిదండ్రులు కూడా స్కూల్ వద్దకు చేరుకుని తమ ఆవేదన వ్యక్తం చేశారు.

ఈ పాఠశాల భవనం సగం నిర్మాణం మాత్రమే పూర్తైంది. ప్రస్తుతం స్థానికంగా ఉన్న ఒక చదువుకున్న మహిళ విద్యార్థులకు ఉచితంగా పాఠాలు చెబుతున్నారు. అయితే ఇది శాశ్వత పరిష్కారం కాదని గ్రామస్తులు అంటున్నారు.

తల్లిదండ్రులు మాట్లాడుతూ రాష్ట్రవ్యాప్తంగా వేలాది టీచర్ పోస్టులు భర్తీ చేస్తున్నప్పటికీ తమ పాఠశాలకు నియామకాలు జరగడం లేదని అన్నారు. ఈ పాఠశాలకు తక్షణమే అదనపు ఉపాధ్యాయులను నియమించాలని, భవన నిర్మాణం పూర్తి చేయాలని డిమాండ్ చేశారు.