చెరకు సాగులో యాంత్రీకరణతో రైతులకు లాభాలు: శాస్త్రవేత్త విజయ్ కుమార్

చెరకు సాగులో కూలీల కొరత, పెరిగిన వేతనాలు రైతులకు తీవ్ర ఇబ్బందులు కలిగిస్తున్నాయి. అయితే యాంత్రీకరణ పద్ధతులతో ఖర్చు తగ్గించి లాభాలు పొందవచ్చని శాస్త్రవేత్త విజయ్ కుమార్ సూచిస్తున్నారు. సంగారెడ్డి జిల్లా బసంతపూర్ చెరుకు పరిశోధనా స్థానం ప్రధాన శాస్త్రవేత్త విజయ్ కుమార్ ఈ విషయం వివరించారు.

సాంప్రదాయిక సాగు విధానంలో ఒక ఎకరం చెరకు నాటడానికి నలుగురు మగ కూలీలు, ఎనిమిది మంది మహిళా కూలీలు అవసరం. దీని ఖర్చు దాదాపు రూ.10,000. చెరకు కోసిన తర్వాత మళ్లీ భూమిలో పెట్టడానికి అదనంగా రూ.6,000 ఖర్చు అవుతోంది. మొత్తం సాగు ఖర్చులో 20 నుంచి 35 శాతం నాటడానికే వెచ్చించాల్సి వస్తోంది. కూలీల లభ్యత తక్కువై ఈ పనులు ఆలస్యమైతే దిగుబడి తగ్గుతుంది.

ఈ సమస్యలకు పరిష్కారంగా "కటర్ ప్లాంటర్" యంత్రాన్ని శాస్త్రవేత్తలు సిఫార్సు చేస్తున్నారు. ఇది ఒకేసారి బోదెలు చేయడం, చెరకు ముక్కలుగా కొట్టడం, వాటిని బోదెల్లో ఉంచడం, మట్టి కప్పడం, కలుపు మందు చల్లడం వంటి ఐదు పనులు చేస్తుంది. ఈ యంత్రంతో ఎకరా నాటడానికి రూ.600 డీజిల్, ముగ్గురు నైపుణ్య కూలీలతో కేవలం రూ.2,000 ఖర్చు అవుతుంది. సంప్రదాయ పద్ధతితో పోలిస్తే ఎకరాకు రూ.8,000 ఆదా అవుతుంది.

కలుపు నివారణ విషయంలోనూ యంత్రాలు ఉపయోగపడతాయి. మానవ శ్రమతో కలుపు తీయడానికి ఎకరాకు 20 మంది కూలీలు, రూ.3,000 ఖర్చు అవుతుంది. కానీ మందు పిచికారి యంత్రంతో రూ.500 ఇంధనం, ఇద్దరు కూలీలతో రూ.600లోపే ఈ పని పూర్తవుతుంది.

చెరకు కోతలోనూ యాంత్రీకరణ పెద్ద మార్పు తీసుకువస్తోంది. మానవ కూలీలతో నరికితే భూమట్టం నుంచి రెండు మూడు అంగుళాలు వదిలేస్తారు. దీంతో ఎకరాకు మూడు నుంచి నాలుగు టన్నుల చెరకు భూమిలో మిగిలిపోతుంది. దీని విలువ సుమారు రూ.12,000. యంత్రంతో నరికితే గంటన్నరలో ఎకరం నరుకుతారు. సంప్రదాయ పద్ధతిలో ఇదే పనికి మూడు నుంచి నాలుగు రోజులు పడుతుంది. యంత్రంతో నరికినప్పుడు వాడిన ఆకులు చిన్న ముక్కలుగా భూమిలో కలిసి త్వరగా కుళ్లిపోతాయి. ఇది సేంద్రియ కర్బనం, నత్రజని, పొటాషియం వంటి పోషకాలను భూమికి అందిస్తుంది. భూమి సారవంతం కావడంతో పాటు రసాయన ఎరువుల వాడకం తగ్గుతుంది.

ఇప్పటికే జహీరాబాద్ ప్రాంతంలో 50 నుంచి 60 యంత్రాలు వాడుతున్నారు. రైతులు ఈ లాభాలు గ్రహించి యంత్రాల కొనుగోలు వైపు మొగ్గు చూపుతున్నారు. చెరకు సాగులో దుక్కి దున్నడం తప్ప మిగతా పనులకు ఇప్పటికీ కూలీలపై ఆధారపడుతున్న రైతులు యంత్రాల వైపు మారితే ఖర్చు తగ్గడంతో పాటు సకాలంలో పనులు జరిగి దిగుబడి పెరుగుతుందని శాస్త్రవేత్త అభిప్రాయపడ్డారు.