చెరకులో కొరడా తెగులు, పసుపు ఆకు తెగులు: నివారణ చర్యలు ఏమిటి?

ఉభయ తెలుగు రాష్ట్రాల్లో చెరకు సాగులో కొరడా తెగులు, పసుపు ఆకు తెగులు తీవ్రంగా నష్టం చేస్తున్నాయని శాస్త్రవేత్తలు హెచ్చరిస్తున్నారు. ఆముదాల వలస కృషి విజ్ఞాన కేంద్రం శాస్త్రవేత్త డాక్టర్ రాజ్‌కుమార్ ఈ తెగుళ్ల లక్షణాలు, నివారణ చర్యలు వివరించారు.

శ్రీకాకుళం, విజయనగరం, విశాఖ జిల్లాల రైతులు ఎకరాకు 20 నుండి 25 టన్నుల దిగుబడి మాత్రమే సాధిస్తున్నారు. సరైన సమయంలో సస్యరక్షణ చర్యలు తీసుకోకపోవడమే ఇందుకు ముఖ్య కారణమని డాక్టర్ రాజ్‌కుమార్ పేర్కొన్నారు.

కొరడా తెగులు సోకిన చెరకు గడ చివర నల్లటి కొరడాలాంటి నిర్మాణం కనిపిస్తుంది. దానిపై తెలుపు రంగు పల్చటి పొర ఉంటుంది. రెండు మూడు రోజుల్లో ఆ పొర చిట్లిపోయి కోట్ల సంఖ్యలో నల్లని శిలీంధ్ర బీజాలు గాలిలో, నేలపై వ్యాపిస్తాయి. గాలి, నీటి ద్వారా ఒక మొక్క నుంచి ఇంకో మొక్కకు వ్యాపిస్తాయి. తెగులు సోకిన గడల నుండి పంచదార శాతం బాగా తగ్గిపోతుంది.

కొరడా తెగులు నివారణకు తెగులు సోకిన గడలను విత్తనంగా వాడకూడదు. విత్తన ముచ్చలను Propiconazole 1 ml ను 1 లీటర్ నీటికి కలిపిన ద్రావణంలో అరగంట నానబెట్టి నాటాలి. లేదా Hexaconazole 2 ml ను 1 లీటర్ నీటికి కలిపి పిచికారీ చేయాలి. మొదటి పిచికారీ తర్వాత నెల రోజులకు రెండోసారి పిచికారీ చేయాలి.

పసుపు ఆకు తెగులు (Yellow Leaf Disease) వైరస్ వల్ల వస్తుంది. 2006లో తెలుగు రాష్ట్రాల్లో కనిపించిన ఈ తెగులు 2012-13 నాటికి చెరకు సాగు చేసే అన్ని ప్రాంతాలకు వ్యాపించింది. చెరకు నాటిన 7 నుండి 8 నెలలకు లక్షణాలు కనిపిస్తాయి. అధిక వర్షాల తర్వాత ఉష్ణోగ్రతలు పెరిగినప్పుడు ఈ తెగులు వేగంగా వ్యాపిస్తుంది.

పసుపు ఆకు తెగులు వల్ల దిగుబడి 37% వరకు తగ్గవచ్చు. రసనాన్యత 17 నుండి 18% వరకు తగ్గుతుందని శాస్త్రవేత్తలు గమనించారు. ఈ వైరస్ తెగులు సోకిన విత్తన ముచ్చలు, రసం పీల్చే పురుగుల ద్వారా వ్యాపిస్తుంది. తోట చివరి వరసల్లో ముందుగా కనిపిస్తుంది. పేనుబంక పురుగు నివారణకు Monocrotophos లేదా Dimethoate మందులు పొలం చివరి రెండు మూడు వరసలకు పిచికారీ చేయాలని డాక్టర్ రాజ్‌కుమార్ సూచించారు.