సూరత్ వ్యాపారి నుంచి 20 మంది ఉద్యోగులకు లక్ష రూపాయల దీపావళి బోనస్

గుజరాత్‌లోని సూరత్‌కు చెందిన వస్త్ర వ్యాపారి రామ్ స్వరూప్ తన వద్ద పనిచేసే 20 మంది ఉద్యోగులకు దీపావళి సందర్భంగా ఒక్కొక్కరికి లక్ష రూపాయలకు పైగా నగదు బోనస్ అందించారు.

పలు రకాల కరెన్సీ నోట్లను వెండి పళ్లెంలో పేర్చి ప్రతి ఉద్యోగికి అందజేశారు. భారీ మొత్తంలో నగదు చూసి ఉద్యోగులు మొదట ఆశ్చర్యపోయారు. తర్వాత ఆనందంతో భావోద్వేగానికి లోనయ్యారు. ఒక మహిళా ఉద్యోగి బోనస్ అందుకుంటూ కన్నీళ్లు పెట్టుకున్నారు.

ఈ కార్యక్రమంలో ఉద్యోగుల కుటుంబ సభ్యులు కూడా పాల్గొన్నారు. తాను చిన్నతనంలో పేదరికాన్ని అనుభవించానని రామ్ స్వరూప్ చెప్పారు. పండుగల సమయంలో కుటుంబాలు ఎదుర్కొనే ఆర్థిక ఇబ్బందులు తనకు తెలుసని ఆయన తెలిపారు. తన దుకాణంలో పనిచేసే వారిని కేవలం ఉద్యోగులుగా కాకుండా కుటుంబ సభ్యులుగానే భావిస్తానని చెప్పారు. ఏడాది పొడవునా వారు చూపించే కష్టపడి పనిచేసే తత్వమే వ్యాపార అభివృద్ధికి కీలకమని పేర్కొన్నారు.

ఉద్యోగులు తమ కుటుంబాల కోసం అవసరమైన వస్తువులు కొనుక్కొని సంతోషంగా పండుగ జరుపుకోవాలనే ఉద్దేశంతో ఈ నిర్ణయం తీసుకున్నట్లు ఆయన వెల్లడించారు. ఖర్చు గురించి ఆలోచించకుండానే ఈ నిర్ణయం తీసుకున్నానని తెలిపారు. ఈ కార్యక్రమం వీడియో వైరల్ కావడంతో ఉద్యోగుల పట్ల వ్యాపారి చూపిన ఆప్యాయతపై నెటిజన్లు ప్రశంసలు కురిపిస్తున్నారు.