స్వర్ణగిరి వెంకటేశ్వర ఆలయంలో పవిత్రోత్సవాలు; వరుణ యాగం ప్రకటన

స్వర్ణగిరి శ్రీ వెంకటేశ్వర స్వామి ఆలయంలో ఈ నెల 22 నుంచి 26 వరకు ఐదు రోజుల పాటు పవిత్రోత్సవాలు జరిగాయి. వేద మంత్రాల నడుమ ప్రత్యేక పూజలు, పవిత్ర సమర్పణలు, వాహన సేవలు నిర్వహించారు.

ఉత్సవాల్లో భాగంగా మొదటి రోజు అంకురార్పణ, పెద్దశేష వాహనం, సాయంత్రం కల్పవృక్ష వాహన సేవ జరిగాయి. రెండో రోజు చతుస్థానార్చన, అగ్ని ప్రతిష్ఠ కార్యక్రమం వేద మంత్రాల నడుమ జరిగింది. మూడో రోజు వసంతోత్సవాలు నిర్వహించారు. శ్రీమద్ ఉభయ వేదాంతాచార్య పీఠం, శ్రీరంగం సూచనల మేరకు ఈ కార్యక్రమాలు చేపట్టారు. ఈ ఉత్సవాలకు వేలాది మంది భక్తులు వచ్చి స్వామివారిని దర్శించుకున్నారు.

శ్రీ శ్రీ త్రిదండి చిన్న జీయర్ రామానుజ జీయర్ స్వామి ఆలయానికి విచ్చేశారు. ప్రత్యేక తిరుమంజనం పూజల్లో పాల్గొన్నారు. పెద్దశేష వాహనంపై కొలువు తిరిగిన స్వామివారిని దర్శించుకున్నారు. భక్తులకు మంగళ శాసనం అందజేశారు.

అనుగ్రహ భాషణంలో ప్రకృతి సమతుల్యత, జల సంరక్షణ ప్రాధాన్యతను వివరించారు. ఎల్ నినో ప్రభావంతో ప్రపంచవ్యాప్తంగా నీటి ఎద్దడి తలెత్తుతున్నందుకు ఆందోళన వ్యక్తం చేశారు. వర్షాల కోసం పూర్వీకులు ఆచరించిన వరుణ యాగాల ప్రాధాన్యతను గుర్తుచేశారు.

తిరుప్పావై నాలుగో పాసురాన్ని పఠిస్తూ, లోక కల్యాణం, సమస్త ప్రాణుల క్షేమం కోసం మరో రెండు రోజుల్లో స్వర్ణగిరి ఆలయంలో వరుణ యాగం నిర్వహిస్తామని చిన్న జీయర్ స్వామి తెలిపారు. విష్ణు సహస్రనామ పారాయణం ప్రతిరోజు చేయాలని సూచించారు.