నెల్లూరు తీరంలో తమిళనాడు మత్స్యకారుల చొరబాటు, మళ్లీ ఉద్రిక్తత

నెల్లూరు జిల్లా సముద్ర తీరంలో తమిళనాడు మత్స్యకారుల చొరబాటు మరోసారి వివాదాస్పదంగా మారింది. కోటమండలం, గోవిందపల్లిపాలెం, శ్రీనివాసపురం తీర ప్రాంతాలకు వచ్చిన తమిళ మెకనైజ్డ్ బోట్లు అక్రమ చేపల వేటకు పాల్పడుతూ స్థానిక మత్స్యకారులతో ఘర్షణకు దిగాయి.

స్థానిక మత్స్యకారుల కథనం ప్రకారం, తమిళ బోట్ల సిబ్బంది రాళ్లు, ఖాళీ సీసాలు విసిరి వారి వలలను ధ్వంసం చేశారు. దాడి భయంతో స్థానిక జాలర్లు చేపల వేట ఆపివేశారు. ఈ ఘటనలపై మెరైన్ పోలీసులు రెండు బోట్లతో గస్తీ కొనసాగిస్తున్నప్పటికీ తమిళ సిబ్బంది పట్టించుకోవడం లేదు.

గతంలో కావలి తీరంలో నాలుగు తమిళ బోట్లను స్థానికులు స్వాధీనం చేసుకొని పోలీసులకు అప్పగించగా, లంచాలు ఇచ్చి వాటిని తిరిగి తీసుకెళ్లినట్లు ఆరోపణలు వచ్చాయి. ఈ నేపథ్యంలో ప్రభుత్వం మూడు ప్రత్యేక బోట్లను పెట్రోలింగ్ కోసం ఏర్పాటు చేసింది.

రెండు నెలల క్రితమే ప్రకాశం జిల్లాలో జరిగిన సమావేశంలో తమిళ బోట్ల చొరబాటు మళ్లీ జరిగే అవకాశం ఉందని హెచ్చరించారు. ఇప్పుడు మళ్లీ చొరబాటు జరగడంతో స్థానిక మత్స్యకారులు ఆందోళన వ్యక్తం చేస్తున్నారు. ఏపీ ప్రభుత్వం తమిళనాడు ప్రభుత్వంతో చర్చలు జరిపి, కఠిన చర్యలు తీసుకోవాలని డిమాండ్ చేస్తున్నారు.