తమిళనాడు: ప్రాజెక్ట్ మేఘాలయ పేరుతో ఎమ్మెల్యేలకు 35 కోట్ల లంచం ఆఫర్ కుట్ర ఆరోపణలు, 9 మంది అరెస్ట్

తమిళనాడు అధికార టీవీకే ప్రభుత్వాన్ని కూల్చేందుకు ‘ప్రాజెక్ట్ మేఘాలయ’ అనే కోడ్ పేరుతో ఎమ్మెల్యేలకు లంచం ఆఫర్ చేసిన ఆరోపణలు వెలుగులోకి వచ్చాయి. కృష్ణగిరి జిల్లా ఉత్తంగరే టీవీకే ఎమ్మెల్యే ఎన్.ఎల్లైరాజా ఫిర్యాదు మేరకు ఈ కేసు బయటపడింది.

ఎల్లైరాజా తెలిపిన వివరాల ప్రకారం.. కొందరు వ్యక్తులు తనను సంప్రదించి అసెంబ్లీలో పార్టీ నిర్ణయానికి వ్యతిరేకంగా ఓటు వేయాలని కోరారు. ప్రతిఫలంగా రూ.35 కోట్ల వరకు నగదు, భవిష్యత్తులో రాజకీయ సహకారం హామీ ఇచ్చారని ఆయన ఆరోపించారు. ఈ మొత్తం ఆపరేషన్ను ‘ప్రాజెక్ట్ మేఘాలయ’ పేరుతో నిర్వహించినట్టు చెప్పారు.

ఈ ఫిర్యాదుతో రంగంలోకి దిగిన తమిళనాడు పోలీసులు శుక్రవారం తొమ్మిది మందిని అరెస్ట్ చేశారు. మాజీ మంత్రి సెల్ బాలాజీ సన్నిహితుడు, డీఎంకే నాయకుడు కార్తీక్ (కరూర్), ఓ ఫైనాన్స్ సంస్థ యజమాని రమేశ్, యూట్యూబ్ ఛానల్ నిర్వాహకుడు తిరునా ఉక్రస్, జర్నలిస్ట్ విజయన్‌లతో సహా పలువురు అరెస్టయ్యారు. విజయన్ తిరునా ఉక్రస్‌కు ఎస్‌ఎమ్‌ఎస్‌లు పంపి ప్రాజెక్ట్ మేఘాలయకు సహకరించినట్టు పోలీసులు గుర్తించారు. విజయన్ సెల్‌ఫోన్‌ను సైబర్ నిపుణుల విశ్లేషణకు పంపినట్టు అధికారులు తెలిపారు. ఫోన్ కాల్ డేటా, డిజిటల్ కమ్యూనికేషన్, ఆర్థిక లావాదేవీల పరిశీలన కొనసాగుతోంది.

ఈ పరిణామాలపై అధికార టీవీకే పార్టీ తీవ్ర స్పందన తెలిపింది. ప్రజాస్వామ్య వ్యవస్థను బలహీనపరిచే చర్యలను సహించబోమని, కుట్రలో పాల్గొన్న వారిపై కఠిన చర్యలు తప్పవని హెచ్చరించింది. మరోవైపు ప్రతిపక్ష పార్టీలు ఈ ఆరోపణలను ఖండించాయి. తమకు ఎలాంటి సంబంధం లేదని స్పష్టం చేస్తూ, ప్రభుత్వం రాజకీయ లబ్ధి కోసం నిరాధార ఆరోపణలు చేస్తోందని విమర్శించాయి. పూర్తిస్థాయి నిష్పాక్షిక దర్యాప్తు జరపాలని డిమాండ్ చేశాయి. ఈ ఆపరేషన్‌కు ‘మేఘాలయ’ అనే పేరు ఎందుకు పెట్టారు, ఆ రాష్ట్రంతో ఏమైనా సంబంధం ఉందా అనేది ఇంకా తేలలేదు.