హైదరాబాద్ మేడిపల్లిలో యువతి మృతి: నగ్నంగా పరిగెత్తి, విగ్రహం తీసుకుని చెరువులో దూకిన తేజస్విని

హైదరాబాద్‌లోని మేడిపల్లి పోలీస్ స్టేషన్ పరిధిలో విషాద ఘటన చోటు చేసుకుంది. 28 ఏళ్ల సాఫ్ట్‌వేర్ ఇంజనీర్ తేజస్విని రాత్రి సమయంలో నగ్నంగా ఇంటి నుంచి బయటకు వెళ్లి పక్కనే ఉన్న చెరువులో దూకి మృతి చెందింది.

విజయనగరం జిల్లా దేవపల్లికి చెందిన తేజస్విని బెంగళూరులో సాఫ్ట్‌వేర్ ఇంజనీర్‌గా పనిచేసి, ఒత్తిడి కారణంగా ఉద్యోగం మానేశారు. ఇటీవల హైదరాబాద్‌లోని పీర్జాదిగూడలో తల్లితో కలిసి నివాసం ఉంటున్నారు.

తేజస్విని తల్లి పోలీసులకు తెలిపిన వివరాల ప్రకారం, ఆమె ఇటీవలి కాలంలో తీవ్రమైన భయాలతో, పీడకలలతో బాధపడుతున్నారు. ఇంట్లో అసౌకర్యంగా ఉన్నందున వేరే ఇంటికి మారే ప్రయత్నంలో భాగంగా సాయంత్రం తల్లీ, కూతురు ఇల్లు వెతికారు. రాత్రి ఇంటికి తిరిగి వచ్చి పడుకున్నారు.

అర్ధరాత్రి సుమారు 2:30 గంటలకు తేజస్విని నిద్ర లేచి తల్లి గదికి బయటి నుంచి తాళం వేసి, నగ్నంగా ఇంటి నుంచి బయటకు పరిగెత్తింది. సమీపంలోని ఆలయంలోకి వెళ్లి ఒక విగ్రహాన్ని తీసుకుని చేతిలో చీరతో పక్కనే ఉన్న చెరువులో దూకి మృతి చెందింది. సీసీటీవీ కెమెరాల్లో ఈ దృశ్యాలు రికార్డయ్యాయి.

పోలీసుల ప్రాథమిక దర్యాప్తులో తేజస్విని ‘ఫియర్ ఫోబియా’తో బాధపడినట్లు తెలుస్తోంది. మృతదేహాన్ని శవపరీక్ష నిమిత్తం ఆస్పత్రికి తరలించారు. ఈ సంఘటనపై వివరణాత్మక దర్యాప్తు కొనసాగుతోంది.