ఎల్ నినో ప్రభావంపై తెలంగాణలో అఖిలపక్ష సమావేశం.. మధ్యాహ్నం 2:30కి ప్రారంభం

ఎల్ నినో ప్రభావం, వర్షాభావ పరిస్థితులపై చర్చించేందుకు తెలంగాణ ప్రభుత్వం అఖిలపక్ష సమావేశం నిర్వహిస్తోంది. హైదరాబాద్ సచివాలయంలో నేడు మధ్యాహ్నం 2:30 గంటలకు ఈ భేటీ ప్రారంభమవుతుంది. ఉపముఖ్యమంత్రి మల్లు భట్టి విక్రమార్క అధ్యక్షతన సమావేశం జరుగుతుంది.

రాష్ట్రంలో నెలకొన్న పరిస్థితులను సమీక్షించేందుకు, రాబోయే నెలల్లో తలెత్తే సమస్యలపై ముందస్తు చర్యలపై సలహాలు తీసుకునేందుకు ముఖ్యమంత్రి రేవంత్ రెడ్డి ఈ అఖిలపక్ష సమావేశాన్ని ఏర్పాటు చేయాలని నిర్ణయించారు. వివిధ రాజకీయ పార్టీల ప్రతినిధులు హాజరై తమ అభిప్రాయాలు, సూచనలు తెలియజేయనున్నారు.

తాగునీటి కొరత ప్రధాన సవాలుగా మారింది. గ్రామీణ, పట్టణ ప్రాంతాల తాగునీటి అవసరాలు తీర్చడం, అందుబాటులో ఉన్న నీటి వనరులను పొదుపుగా వాడటం, జలాశయాల్లో నీటి నిల్వలను అవసరాలకు అనుగుణంగా నిర్వహించడం వంటి అంశాలపై చర్చ జరగనుంది.

సాగునీటిని ప్రాధాన్యతల ఆధారంగా వినియోగించడం, తక్కువ నీటితో సాగయ్యే పంటలను ప్రోత్సహించడం, రైతులకు ముందస్తు సూచనలు ఇవ్వడం వంటి అంశాలు చర్చకు వస్తాయి. వ్యవసాయానికి నిరంతర విద్యుత్ సరఫరా, పశువులకు తాగునీరు, పశుగ్రాసం, గ్రామీణ ఉపాధి అవకాశాలపైనా చర్చించనున్నారు.

ఇప్పటికే ఉపముఖ్యమంత్రి భట్టి విక్రమార్క నేతృత్వంలో మంత్రుల క్యాబినెట్ సబ్ కమిటీ ఏర్పాటైంది. వివిధ శాఖల అధికారులతో ఈ కమిటీ సమీక్షలు నిర్వహిస్తూ శాఖల వారీగా కార్యాచరణ ప్రణాళికలు రూపొందిస్తోంది. రాష్ట్రంలో 31 జిల్లాల్లో 365 కరువు ప్రభావిత మండలాలను ప్రభుత్వం ప్రకటించింది.

అఖిలపక్ష సమావేశంలో వచ్చిన అభిప్రాయాలు, సూచనలను పరిగణనలోకి తీసుకుని ప్రభుత్వం తదుపరి కార్యాచరణను రూపొందించనుంది.