తెలంగాణలో ఆటో, క్యాబ్, స్కూల్ వ్యాన్ బందు విరమించిన కార్మిక సంఘాలు

తెలంగాణలో ఈ అర్ధరాత్రి నుంచి జరగాల్సిన ఆటో, క్యాబ్, స్కూల్ వ్యాన్ బందును కార్మిక సంఘాలు విరమించుకున్నాయి. రవాణా శాఖతో జరిగిన చర్చలు సఫలం కావడంతో ఈ నిర్ణయం తీసుకున్నారు.

మంత్రి పొన్నం ప్రభాకర్ సంఘాల డిమాండ్లపై సానుకూలంగా స్పందించినట్టు సంఘాలు తెలిపాయి. ఆర్టీసీ ద్వారా EV ఆటోలను ప్రవేశపెట్టాలన్న ప్రతిపాదనను వెంటనే వెనక్కి తీసుకోవాలని సంఘాలు డిమాండ్ చేశాయి.

ప్రైవేటు రవాణా కార్మికుల కోసం ప్రత్యేక సంక్షేమ బోర్డు ఏర్పాటు చేయాలని కోరారు. ఆటో, క్యాబ్, స్కూల్ వ్యాన్ డ్రైవర్ల సమస్యలను తక్షణమే పరిష్కరించాలని కూడా మంత్రికి వివరించారు.