విబిజి రామజీ ఉపాధి హామీ చట్టాన్ని అమలు చేస్తున్న తెలంగాణ; సుప్రీంకు వెళ్లేందుకు కేబినెట్ నిర్ణయం

తెలంగాణ ప్రభుత్వం కేంద్రం తీసుకొచ్చిన విబిజి రామజీ ఉపాధి హామీ చట్టాన్ని రాష్ట్రంలో అమలు చేయాలని, ఒకేసారి సుప్రీంకోర్టులో న్యాయపోరాటం చేయాలని కేబినెట్ నిర్ణయించింది. ముఖ్యమంత్రి రేవంత్ రెడ్డి అధ్యక్షతన జరిగిన తొలి డిజిటల్ కేబినెట్ సమావేశంలో ఈ నిర్ణయం తీసుకున్నారు.

కేంద్రం రాష్ట్రాలను సంప్రదించకుండా, అభిప్రాయాలను పట్టించుకోకుండా చట్టాన్ని అమల్లోకి తెచ్చిందని కేబినెట్ నిరసన తెలిపింది. ఈ నేపథ్యంలో అనివార్య పరిస్థితుల్లో పథకాన్ని అమలు చేస్తూనే, దాని నిబంధనలపై సుప్రీంకోర్టును ఆశ్రయించాలని నిర్ణయించామని రెవెన్యూశాఖ మంత్రి పొంగులేటి శ్రీనివాస్ రెడ్డి తెలిపారు.

మూసి రివర్ ఫ్రంట్ డెవలప్మెంట్ మొదటి దశ ప్రాజెక్టుకు రూ.7,345 కోట్లు మంజూరు చేశారు. అన్ని ప్రభుత్వ, జూనియర్ కళాశాలల్లో విద్యార్థులతోపాటు ఉపాధ్యాయులు, లెక్చరర్లు, సిబ్బందికి కూడా అల్పాహారం, పాలు, మధ్యాహ్న భోజనం అందించే నిర్ణయాన్ని కేబినెట్ తీసుకుంది.

వరంగల్, సనత్‌నగర్, ఎల్బీ నగర్, అల్వాల్ టిమ్స్ సూపర్ స్పెషాలిటీ ఆసుపత్రుల బలోపేతానికి 6,278 డాక్టర్ల, వైద్యసిబ్బంది పోస్టులు మంజూరు చేశారు. వీటికి సీఎం రిలీఫ్ ఫండ్ నుంచి ఎల్ఓసీలు ఇవ్వాలని సీఎం రేవంత్ రెడ్డి ఆదేశించారు.

మూసి ప్రాజెక్టుపై కేబినెట్‌లో వాడివేడి చర్చ జరిగింది. మూసి నదిలోకి మంచినీళ్లు ఎక్కడి నుంచి వస్తాయని మంత్రి ఉత్తమ్‌కుమార్ రెడ్డి ప్రశ్నించగా, ప్రతిపక్ష నాయకుల పద్ధతిలో మాట్లాడితే ఎలాగని ఒక సీనియర్ మంత్రి ప్రశ్నించినట్లు వర్గాలు తెలిపాయి. సీఎం రేవంత్ రెడ్డి జోక్యం చేసుకుని ప్రాజెక్టును సమగ్రంగా వివరించారు. సాగునీటి ప్రాజెక్టుల సవరించిన అంచనాలను తర్వాతి కేబినెట్‌లో చర్చిస్తామని చెప్పారు.

పలుచోట్ల భూముల కేటాయింపునకు కేబినెట్ ఆమోదం తెలిపింది. మహబూబ్‌నగర్ జిల్లా పెద్దాయిపల్లి, సూర్యాపేట జిల్లా కోదాడలో జవహర్ నవోదయ విద్యాలయాలకు, జగిత్యాల జిల్లా చల్కల్లో కేంద్రీయ విద్యాలయానికి, ఉత్తర తెలంగాణలో కాంగ్రెస్ పార్టీ కార్యాలయాలకు స్థలాలు కేటాయించింది. వర్షాభావ పరిస్థితుల నేపథ్యంలో గ్రామాల్లో తాగునీటి సమస్య రాకుండా చర్యలు తీసుకోవాలని చర్చించింది.