తెలంగాణ నూతన సీఎస్ నియామకం: వికాస్ రాజ్, జయేశ్ రంజన్ పేర్లు తెరపైకి

తెలంగాణ ప్రభుత్వం నూతన ప్రధాన కార్యదర్శి నియామక ప్రక్రియలో సీనియర్ ఐఏఎస్ అధికారులు వికాస్ రాజ్, జయేష్ రంజన్‌లను ప్రధానంగా పరిశీలిస్తోంది. ప్రస్తుత సీఎస్ రామకృష్ణారావు పదవీ కాలం ఈ నెల 30తో ముగియనుంది.

రామకృష్ణారావు 1991 బ్యాచ్ ఐఏఎస్ అధికారి. గత ఏడాది ఆగస్టులో పదవీ విరమణ చేయాల్సి ఉన్నా, రాష్ట్ర ప్రభుత్వం కోరికపై కేంద్రం 10 నెలల పొడిగింపు ఇచ్చింది. మూడోసారి పొడిగింపుకు అవకాశం లేదని సెక్రటేరియట్ వర్గాలు చెబుతున్నాయి.

కొత్త సీఎస్ ఎంపిక కోసం సీఎం రేవంత్ రెడ్డి 1992 బ్యాచ్ అధికారులను పరిశీలిస్తున్నారు. 1990 బ్యాచ్ అధికారి శశాంక్ కోయల్ సెప్టెంబర్‌లో రిటైర్, అరవింద్ కుమార్ సస్పెన్షన్ లో ఉన్నారు. దీంతో వికాస్ రాజ్, జయేష్ రంజన్ లపై దృష్టి పెట్టినట్టు తెలుస్తోంది.

వికాస్ రాజ్ ప్రస్తుతం ఆర్ఎన్బి, వరంగల్ ఎయిర్‌పోర్ట్ వంటి శాఖల్లో స్పెషల్ సీఎస్ గా ఉన్నారు. ఆయన రాష్ట్ర ఎన్నికల ప్రధాన అధికారిగా చేసిన పని తీరు, హైవే ప్రాజెక్టుల అమలు సీఎం రేవంత్ రెడ్డి సంతృప్తికి కారణమైందని సెక్రటేరియట్ వర్గాలు తెలిపాయి.

జయేష్ రంజన్ మున్సిపల్ అడ్మినిస్ట్రేషన్, అర్బన్ డెవలప్మెంట్ స్పెషల్ సీఎస్ గా బాధ్యతలు నిర్వర్తిస్తున్నారు. గతంలో ఐటీ శాఖ కార్యదర్శిగా ప్రపంచ దిగ్గజ సంస్థల పెట్టుబడులను హైదరాబాద్‌కు తీసుకురావడంలో కీలక పాత్ర పోషించారు. మెట్రో విస్తరణ, మూసీ పునరుజ్జీవన ప్రాజెక్టుల వేగవంతం చేయడంలో ఈయన అనుభవం ఉపయోగపడుతుందని సీఎం భావిస్తున్నట్టు సమాచారం.

జయేష్ రంజన్ కు 2027లో పదవీ విరమణ ఉన్నా, సీఎస్ పదవి లభిస్తే 15 నెలలు కొనసాగే అవకాశం ఉంది. వికాస్ రాజ్ కు పదవి దక్కితే రెండేళ్లపాటు ఆ పదవిలో కొనసాగవచ్చు. కేంద్ర డిప్యుటేషన్‌లో ఉన్న సంజయ్ జాజు, సవ్యసాచి ఘోష్ పేర్లు కూడా పరిశీలనలో ఉన్నాయి. అయితే స్థానికంగా అందుబాటులో ఉన్న ఇద్దరిలో ఒకరికే సీఎస్ పదవి వచ్చే అవకాశం ఎక్కువగా కనిపిస్తోంది.

మరోవైపు, రామకృష్ణారావుకు మరోసారి పొడిగింపు కోసం రాష్ట్ర ప్రభుత్వం గట్టి ప్రయత్నం చేస్తే చివరి నిమిషంలో సమీకరణాలు మారే అవకాశమూ ఉందని వర్గాలు అంటున్నాయి. అయితే ప్రస్తుతానికి నూతన సీఎస్ నియామకమే ఖాయమని భావిస్తున్నారు.