తెలంగాణలో 365 మండలాల్లో కరువు: ప్రత్యేక కార్యాచరణ సిద్ధం

తెలంగాణలో 365 మండలాల్లో కరువు పరిస్థితులు ఉన్నట్లు ప్రభుత్వం ప్రకటించింది. కరువును ఎదుర్కోవడానికి రాష్ట్ర ప్రభుత్వం ప్రత్యేక కార్యాచరణ ప్రణాళిక సిద్ధం చేస్తోంది. పంట నష్టపోయిన రైతులతో పాటు వ్యవసాయ కూలీలు, పశు పోషకులు, గ్రామీణ ప్రజలను ఆదుకునేలా ఈ ప్రణాళిక రూపొందుతోంది.

El Nino ప్రభావంతో రాష్ట్రంలో వర్షాభావ పరిస్థితులు ఏర్పడ్డాయి. వానాకాలంలో ఆశించిన స్థాయిలో వర్షాలు కురవలేదు. దీంతో వ్యవసాయ రంగంపై తీవ్ర ప్రభావం పడింది. భూగర్భ జలాలు తగ్గిపోయాయి. ప్రాజెక్టుల్లో నీటి నిలువలు పడిపోవడంతో సాగు విస్తీర్ణం తగ్గింది.

సాగు విస్తీర్ణం తగ్గడంతో గ్రామీణ ప్రాంతాల్లో వ్యవసాయ పనులు తగ్గే ప్రమాదం ఉంది. దీని ప్రభావం ఎక్కువగా వ్యవసాయ కూలీలపై పడుతుంది. ఉపాధి హామీ పథకం కింద అదనంగా 50 రోజుల పని దినాలు కల్పించాలని రాష్ట్ర ప్రభుత్వం కేంద్రాన్ని కోరింది. కేంద్రం అనుమతి ఇస్తే కరువు ప్రభావిత ప్రాంతాల్లోని అర్హులైన కుటుంబాలకు మరిన్ని పని దినాలు అందుబాటులోకి వస్తాయి.

ఉపాధి హామీ పనుల్లో చెరువుల పూడిక తీత, నీటి సంరక్షణ, ఫామ్ పాండ్స్ నిర్మాణం, భూసార పరిరక్షణ పనులకు ప్రాధాన్యం ఇవ్వనున్నారు. ఈ పనుల వల్ల ప్రజలకు ఆదాయం దొరకడమే కాదు, భవిష్యత్తులో నీటి సమస్యలు కూడా తగ్గుతాయి. తాగునీటి విషయంలో గ్రామాలు, తాండాల్లో సరఫరాను పర్యవేక్షించాలని అధికారులకు సూచించారు. అవసరమైనచోట ట్యాంకర్లతో నీరు అందించాలని ఆదేశించారు. బోర్లు, ఇతర నీటి వనరుల పరిస్థితిని ఎప్పటికప్పుడు పరిశీలించాలని చెప్పారు.

వర్షాలు లేక పచ్చిక బయళ్లు ఎండిపోవడంతో పశుగ్రాసం కొరత ఏర్పడే ప్రమాదం ఉంది. దీంతో జిల్లాల వారీగా పశుగ్రాస అవసరాలు, అందుబాటులో ఉన్న వనరులపై అధికారులు అంచనాలు రూపొందిస్తున్నారు. రైతులకు పశుగ్రాస విత్తనాలు అందించి తక్కువ సమయంలో గడ్డి అందుబాటులోకి తీసుకురావాలని ప్లాన్ చేస్తున్నారు. నీటి లభ్యత ఉన్న చెరువు శిఖం భూముల్లో 5 నుంచి 10 ఎకరాల విస్తీర్ణంలో పశుగ్రాసం సాగు చేయాలని నిర్ణయించారు. యాసంగి సాగుపై అనిశ్చితి నెలకొనడంతో వరి సాగుకు దూరంగా ఉండాలని రైతులకు సూచిస్తోంది. దొరికిన నీటిని తాగునీటి అవసరాలకు వినియోగించాలని చెప్తోంది. సాగుకు దూరంగా ఉండే రైతులకు ప్రత్యేక ఆర్థిక సహాయం ఇవ్వాలనే అంశంపై ప్రభుత్వం చర్చిస్తోంది. రుణాల రీషెడ్యూలింగ్‌పై బ్యాంకర్ల కమిటీతో చర్చించి, అర్హులైన రైతులకు వెసులుబాటు కల్పించాలని కలెక్టర్లకు సూచించింది. రైతులకు పెట్టుబడి సహాయం, కూలీలకు ఉపాధి, పశు పోషకులకు పశుగ్రాసం — ఈ అంశాలను సమన్వయం చేసుకుంటూ కరువు నివారణ కార్యాచరణ రూపొందించాలని అధికారులను ఆదేశించింది.