ఉద్యోగుల నూతన ఆరోగ్య పథకం జులై 15 నుంచి – EHS బోర్డు నిర్ణయం

తెలంగాణ ప్రభుత్వం రాష్ట్ర ఉద్యోగుల కోసం కొత్త ఆరోగ్య పథకాన్ని జులై 15 నుంచి అమలు చేయనుంది. ముఖ్య కార్యదర్శి రామకృష్ణారావు అధ్యక్షతన జరిగిన ఉద్యోగుల ఆరోగ్య సంరక్షణ ట్రస్ట్ (EHS) బోర్డు తొలి సమావేశంలో ఈ నిర్ణయం తీసుకున్నారు.

పథకం నిబంధనలు, ఆసుపత్రుల జాబితా, చికిత్సల రేట్లు వారం రోజుల్లో ఖరారు చేస్తారు. ఉద్యోగులు తమ మూల వేతనంలో 1.5% చెల్లించాలి. అదే మొత్తాన్ని ప్రభుత్వం జమ చేస్తుంది.

భార్యాభర్తలిద్దరూ ఉద్యోగులైతే ఒక్కరి నుంచే చందా తీసుకుంటారు. ఇద్దరి జీతాల నుంచి ముందే మినహాయిస్తే ఒకరికి తిరిగి చెల్లిస్తారు. రాష్ట్రంలో సుమారు 4 లక్షల మంది ఉద్యోగులు, 13 లక్షల మంది కుటుంబ సభ్యులు ఈ పథకం పరిధిలోకి వస్తారు.

ఏడాదికి ఉద్యోగుల నుంచి 528 కోట్లు, ప్రభుత్వం నుంచి 528 కోట్ల రూపాయలు సమకూరతాయి. పూర్తి వివరాలు త్వరలో విడుదల కానున్నాయి.