తెలంగాణ: సన్న బియ్యం ధరలు పెరుగుతున్నా సన్న ధాన్యం రైతులకు ఇబ్బందులు

నల్గొండ జిల్లా మిర్యాలగూడ ప్రాంతంలో సన్న ధాన్యం సాగు చేసిన రైతులు పంట అమ్ముకోవడంలో ఇబ్బందులు ఎదుర్కొంటున్నారు. మార్కెట్లో సన్న బియ్యం ధరలు పెరుగుతున్నా రైతులకు మద్దతు ధర అందడం లేదని వారు చెప్తున్నారు.

ఈ ప్రాంతంలో ఏటా దాదాపు 3 లక్షల ఎకరాల్లో వరి సాగు జరుగుతుంది. అందులో 1.5 లక్షల నుంచి 2 లక్షల ఎకరాల్లో సన్నాలు సాగు చేస్తారు. ఈసారి El Nino ప్రభావంతో ప్రతికూల వాతావరణ పరిస్థితులు ఏర్పడ్డాయి. దీంతో సగం వరకు సన్నాలు చేతికి రాలేదని రైతులు చెప్తున్నారు.

జూన్‌లో నారు పోసిన ఈ పంట కోతలు 20 రోజుల క్రితమే మొదలయ్యాయి. జిల్లాలో ధాన్యం కొనుగోలు కేంద్రాలు ప్రారంభమైనా కార్యకలాపాలు మొదలు కాకపోవడంతో రైతులు మిల్లర్లపై ఆధారపడాల్సి వస్తోంది.

మిల్లర్లు క్వింటాల్ సన్న ధాన్యాన్ని మొదట ₹4,500 వరకు చెల్లించి కొనుగోలు చేశారు. తర్వాత ధరను ₹3,700కు తగ్గించినట్లు రైతులు చెప్తున్నారు. మిల్లర్లు సిండికేట్‌గా మారి ధరలను తగ్గించారని వారు ఆరోపిస్తున్నారు.

తమ కష్టాన్ని దోచుకుంటున్నారని రైతులు మండిపడుతున్నారు. మద్దతు ధర కోరుతూ వారు రాస్తారోకో చేపట్టారు. రైతు సంఘాలు మిల్లర్ల తీరును ఖండిస్తున్నాయి. ప్రభుత్వం జోక్యం చేసుకుని సన్న ధాన్యానికి మద్దతు ధర పెంచాలని కోరుతున్నాయి. ఈ విషయంపై ప్రభుత్వం, మిల్లర్ల స్పందన తెలియాల్సి ఉంది.