తెలంగాణ తొలి డిజిటల్ క్యాబినెట్ సమావేశం జూలై 2న

తెలంగాణ రాష్ట్రంలో తొలిసారి కాగితం లేని మంత్రివర్గ సమావేశం జూలై 2న జరగనుంది. ముఖ్యమంత్రి రేవంత్ రెడ్డి అధ్యక్షతన సచివాలయంలో ఈ సమావేశం జరుగుతుంది.

ఈ నెల 18న ముఖ్యమంత్రితో పాటు మంత్రులందరికీ ఐటీ శాఖ అధికారులు ల్యాప్‌టాప్‌లు అందజేసి, డిజిటల్ క్యాబినెట్ నిర్వహణ తీరును వివరించారు. మంత్రులు లాగిన్ ఐడీలు, పాస్‌వర్డ్‌లు సిద్ధం చేసుకున్నారు. ఇక నుంచి క్యాబినెట్ అజెండా, సమావేశం మినిట్స్, ఇతర డాక్యుమెంట్లు పూర్తిగా డిజిటల్ రూపంలోనే ఉంటాయి.

ఈ సమావేశంలో విబి జీరామజీ పథకం అమలుపై చర్చించనున్నారు. మంత్రివర్గ ఉపసంఘం ఈ పథకాన్ని రాష్ట్రంలో అమలు చేయకూడదని నిర్ణయించిన నేపథ్యంలో, సుప్రీంకోర్టుకు వెళ్లాలా లేదా ఇతర రాష్ట్రాలతో కలిసి ఎలాంటి కార్యాచరణ చేపట్టాలనే అంశంపై నిర్ణయం తీసుకోనున్నారు. రైతులు నష్టపోకుండా రాష్ట్రంలో ప్రత్యేక గ్రామీణ ఉపాధి హామీ చట్టం చేయాలన్న ఆలోచనలపై కూడా క్యాబినెట్ చర్చించనుంది.

వానాకాలం సాగుపై చర్చించి, విత్తనాలు, ఎరువుల పంపిణీ, పంటల వైవిధ్యం, ఎల్నినో ప్రభావంపై అధికారులకు ఆదేశాలు ఇస్తారు. ఏపీ, తెలంగాణ స్థానికత కలిగిన ఉద్యోగుల అంతర్రాష్ట్ర బదిలీలపైనా నిర్ణయం తీసుకుంటారు. ఏపీ నుంచి తెలంగాణకు 891 మంది, తెలంగాణ నుంచి ఏపీకి 1,329 మంది ఉద్యోగులు బదిలీ కోరుతున్నారు. హైదరాబాద్ కోర్ అర్బన్ ప్రాంతంలో ఎల్ఐజీ హౌసింగ్ ప్రాజెక్టుకు సంబంధించిన స్థలాలు, డిజైన్లు, విధి విధానాలకు క్యాబినెట్ ఆమోదం లభించే అవకాశం ఉంది.