తెలంగాణకు వారం రోజుల వర్ష హెచ్చరిక: ఉత్తరాది జిల్లాల్లో భారీ వర్షాలు

తెలంగాణ వాతావరణ శాఖ రాష్ట్రవ్యాప్తంగా వారం రోజుల పాటు వర్షాలు కురిసే అవకాశం ఉందని హెచ్చరించింది. జూలై 2 నుంచి 8 వరకు రాష్ట్రంలోని పలు జిల్లాల్లో వర్షాలు కురుస్తాయని వెల్లడించింది.

ముఖ్యంగా ఆదిలాబాద్, కొమరంబీం ఆసిఫాబాద్, మంచిర్యాల, నిర్మల్, ములుగు జిల్లాల్లో జూలై 2, 3 తేదీల్లో భారీ వర్షాలు కురిసే అవకాశం ఉంది. జూలై 3 నుంచి 4 వరకు ఈ జిల్లాలతో పాటు నిజామాబాద్, జగిత్యాల, ఖమ్మం, నల్గొండ, సూర్యపేట, మేడ్చల్, వికారాబాద్, సంగారెడ్డి, మెదక్, కామారెడ్డి, మహబూబ్‌నగర్, నాగర్‌కర్నూల్, వనపర్తి, నారాయణపేట, జోగులాంబ గద్వాల జిల్లాల్లో కూడా వర్షాలు కురుస్తాయి. రాష్ట్రవ్యాప్తంగా ఉరుములు, మెరుపులతో పాటు గంటకు 30 నుంచి 50 కి.మీ. వేగంతో ఈదురుగాలు వీచే అవకాశం ఉంది.

హైదరాబాద్‌లో ఇవాళ ఆకాశం మేఘావృతమై సాయంత్రం వరకు వాన పడుతుంది. ఈ వర్షం రాత్రి వరకు కొనసాగుతుంది. ఋతుపవనాల ప్రభావం, అల్పపీడనం కారణంగా రాష్ట్రంలో వారం రోజుల పాటు విస్తారంగా వర్షాలు కురుస్తాయని IMD కూడా హెచ్చరించింది.

అయితే, గత జూన్ నెలలో రాష్ట్రంలో అనుకున్న స్థాయిలో వర్షపాతం నమోదు కాలేదు. జూలైలోనూ తగినంత వర్షాలు పడే అవకాశం తక్కువగా ఉండవచ్చని వాతావరణ నిపుణులు అంటున్నారు. దీని ప్రభావం వ్యవసాయంపై స్పష్టంగా కనిపిస్తోంది. రాష్ట్ర వ్యవసాయ శాఖ లెక్కల ప్రకారం, ఇప్పటివరకు కేవలం 12% పంటల సాగు మాత్రమే ప్రారంభమైంది.

ప్రాజెక్టులు, చెరువుల్లో నీటి నిల్వలు తక్కువగా ఉన్నాయి. కృష్ణా, గోదావరి నది బేసిన్‌లో నీరు లేకపోవడంతో ఆయకట్టు సాగుకు ఇబ్బందులు ఏర్పడ్డాయి. సీఎం రేవంత్ రెడ్డి రైతు భరోసా నిధుల కార్యక్రమంలో మాట్లాడుతూ, ఈ వర్షాభావ పరిస్థితుల్లో నీటి వినియోగం తక్కువగా ఉండే పంటలు వేసుకోవాలని రైతులకు సూచించారు. రాబోయే వారం వర్షాలు పడతాయన్న అంచనాలతో రైతులు ఆశగా ఎదురుచూస్తున్నారు.