రాబోయే 20 ఏళ్లు విద్యారంగంలో చాలా కీలకం: ప్రొఫెసర్ వి. కృష్ణారెడ్డి

హనుమకొండలోని మాస్టర్జీ డిగ్రీ కాలేజీలో 2026-27 విద్యా సంవత్సరం నూతన డిగ్రీ, పీజీ సిలబస్‌పై అవగాహన సదస్సు నిర్వహించారు. ఈ కార్యక్రమానికి తెలంగాణ ఉన్నత విద్యా మండలి చైర్మన్ ప్రొఫెసర్ వి. కృష్ణారెడ్డి ముఖ్య అతిథిగా హాజరయ్యారు. మాస్టర్జీ విద్యా సంస్థల చైర్మన్ సంఘం సుందర్రాజ్ కూడా పాల్గొన్నారు.

సదస్సులో మాట్లాడిన ప్రొఫెసర్ కృష్ణారెడ్డి, "రాబోయే రెండు దశాబ్దాలు విద్యారంగంలో ఎంతో కీలకం" అని పేర్కొన్నారు. "డిగ్రీ చదవడం దండగ కాదు, అది ఒక పండగ లాంటిది. మారుతున్న కాలానికి అనుగుణంగా కొత్త కోర్సులు, ట్రెండింగ్ సబ్జెక్టులు అందుబాటులోకి వస్తున్నాయి. తద్వారా డిగ్రీ విద్యార్థులకు ఉపాధి అవకాశాలు ఎక్కువగా లభిస్తాయి" అని వివరించారు.

నూతన సిలబస్‌లో వచ్చిన మార్పులపై అధ్యాపకులు పూర్తి అవగాహనతో ముందుకు సాగాలని, కొత్త టెక్నాలజీలను సద్వినియోగం చేసుకోవాలని ఆయన పిలుపునిచ్చారు. క్రెడిట్ సిస్టమ్‌లో వచ్చిన మార్పులు, డిగ్రీ, ఇంజనీరింగ్ కోర్సుల పునర్నిర్మాణం గురించి కూడా వివరించారు. విద్యార్థులకు పరిశ్రమల అవసరాలకు అనుగుణంగా శిక్షణ ఇవ్వాలన్న సీఎం రేవంత్ రెడ్డి ఆదేశాల మేరకు కొత్త కోర్సులు రూపొందిస్తున్నామని తెలిపారు. ఈ సందర్భంగా అధ్యాపకుల సందేహాలను నివృత్తి చేశారు.