తెలంగాణలో మూడు రోజుల వర్ష హెచ్చరిక: పలు జిల్లాలకు ఎల్లో అలర్ట్

బంగాళాఖాతంలో ఏర్పడిన అల్పపీడనం తీవ్ర రూపం దాల్చిందని వాతావరణ శాఖ తెలిపింది. దీని ప్రభావంతో తెలంగాణలో ఈరోజు, రేపు, ఎల్లుండి తేలికపాటి నుంచి మోస్తరు వర్షాలు కురిసే అవకాశం ఉంది. ఈ అల్పపీడనం పశ్చిమ దిశగా కదిలి ఉత్తర ఒడిస్సా, బెంగాల్ మీదుగా వెళ్లే అవకాశం ఉందని అధికారులు చెప్పారు.

కొన్ని జిల్లాల్లో ఉరుములు, మెరుపులు, ఈదురుగాలులతో కూడిన వర్షాలు పడే అవకాశం ఉంది. వాతావరణ శాఖ పలు జిల్లాలకు ఎల్లో అలర్ట్ జారీ చేసింది. ఆదిలాబాద్, కొమరం భీమ్ అసిఫాబాద్, జగిత్యాల, మంచిర్యాల, నిర్మల్ జిల్లాల్లో ఉదయం నుంచి వర్షం నమోదవుతోంది.

దక్షిణ, పశ్చిమ తెలంగాణలో తేలికపాటి వర్షాలు కురుస్తున్నాయి. కామారెడ్డి, నిజామాబాద్, మేడ్చల్, మల్కాజ్గిరి, సిద్దిపేట, భువనగిరి, నల్గొండ, రంగారెడ్డి, సూర్యాపేట జిల్లాలకు ఎల్లో అలర్ట్ అమల్లో ఉంది. వరంగల్, హనుమకొండ, భద్రాద్రి కొత్తగూడెం, ఖమ్మం, మహబూబ్‌నగర్ జిల్లాలకు కూడా ఎల్లో అలర్ట్ జారీ చేశారు.

హైదరాబాద్‌లో మేఘావృత వాతావరణం కొనసాగుతుంది. నగరంలోని కొన్ని ప్రాంతాల్లో ఈరోజు తేలికపాటి నుంచి మోస్తరు వర్షాలు కురిసే అవకాశం ఉంది. తూర్పు, దక్షిణ హైదరాబాద్‌లో ఇప్పటికే తేలికపాటి వర్షం కురుస్తోంది.

వచ్చే 24 గంటల్లో పలు ప్రాంతాల్లో వర్షం పడే అవకాశం ఉందని వాతావరణ శాఖ హెచ్చరించింది. ప్రజలు అప్రమత్తంగా ఉండాలని అధికారులు తెలిపారు.