రాబోయే 5 రోజులు తెలంగాణలో తేలికపాటి వర్షాలు: వ్యవసాయ సూచనలు

హైదరాబాద్ వాతావరణ కేంద్రం సమాచారం ప్రకారం, రాబోయే ఐదు రోజుల్లో తెలంగాణలో అక్కడక్కడ తేలికపాటి నుండి ఓ మోస్తారు వర్షాలు కురిసే అవకాశం ఉంది.

పగటి ఉష్ణోగ్రతలు 30 నుండి 37 డిగ్రీల సెల్సియస్ మధ్య నమోదు కాగా, రాత్రి ఉష్ణోగ్రతలు 23 నుండి 29 డిగ్రీల సెల్సియస్ వరకు ఉండొచ్చని అంచనా.

ప్రొఫెసర్ జయశంకర్ తెలంగాణ వ్యవసాయ విశ్వవిద్యాలయం రైతులకు పలు సూచనలు చేసింది. నీటి వసతి ఉన్న చోట ఆముదం, కంది, ప్రొద్దు తిరుగుడు, వేరు శెనగ వంటి ప్రత్యామ్నాయ పంటలు విత్తుకోవాలని సూచించింది. పట్టణ శివార్లలో పరిమిత నీటితో కూరగాయలు సాగు చేయవచ్చు.

భారీ వర్షాలు కురిసిన ప్రాంతాల్లో పొలాల నుంచి మురుగు నీటిని తీసివేయాలి. తక్కువ నీటి వసతి ఉన్న రైతులు ఆరుతడి పంటలను బోదెలు, కాలువల పద్ధతిలో సాగు చేసుకోవాలి. ఇప్పటికే విత్తిన ఆరుతడి పంటల్లో చివరి అంతర కృషికి మక్కి నాగలి వాడితే తేమ నియంత్రణకు ఉపయోగపడుతుంది.

వరి నారుమడి తయారీలో ఎకరాకు 800 గ్రాముల కార్బోఫ్యూరాన్ గుళికలు ఇసుకతో కలిపి చల్లుకోవాలి. కాండం తొలుచు పురుగు ఆశించే ప్రాంతాల్లో నాటిన 15 రోజులకు ఎకరాకు 10 కిలోల కార్బోఫ్యూరాన్ వాడాలి. నాటు తర్వాత ప్రతి 2 మీటర్లకు కాలిబాట తీస్తే గాలి, వెలుతురు బాగా ప్రసరిస్తుందని, సుడిదోమ నివారణ జరుగుతుందని వివరించింది.

మొక్కజొన్న స్వల్పకాలిక రకాలను జూలై 31 వరకు విత్తుకోవచ్చు. మొక్కజొన్నలో కత్తెర పురుగు నివారణకు వేప నూనె పిచికారీ, లేదా క్లోరాట్రినిలిప్రోల్ లేదా స్పైనటోరం మందులను లీటర్ నీటికి కలిపి ఆకు సుడుల్లో పిచికారీ చేయాలి. మోకాలు ఎత్తు దశలో 1 కిలో సున్నం, 9 కిలోల ఇసుక మిశ్రమాన్ని మొక్క సుడుల్లో వేసి కత్తెర పురుగు నివారించాలి.