రష్యాలో చిక్కుకున్న ఇద్దరు తెలంగాణ యువకులు.. యుద్ధంలో పాల్గొనాలంటూ ఒత్తిడి

రష్యాలో మంచి ఉద్యోగం ఇప్పిస్తామని ఏజెంట్లు నమ్మించి పంపిన ఇద్దరు తెలంగాణ యువకులు అక్కడ సైనిక శిక్షణ తర్వాత యుద్ధంలో పాల్గొనాలంటూ ఒత్తిడిని ఎదుర్కొంటున్నారు. వారిని క్షేమంగా స్వగ్రామాలకు రప్పించాలని కుటుంబ సభ్యులు విజ్ఞప్తి చేస్తున్నారు.

రాజన్న సిరిసిల్ల జిల్లా ఎల్లారెడ్డిపేట మండలానికి చెందిన కిషన్ ఆరు నెలల క్రితం రష్యా వెళ్లారు. శ్రీనివాస్ అనే ఏజెంట్ మంచి ఉపాధి, మంచి జీతం ఉంటుందని చెప్పి ఆయనను పంపించారని కుటుంబం చెబుతోంది. అక్కడికి వెళ్లిన తర్వాత కిషన్‌కు సైనిక శిక్షణ ఇప్పించారు. యుద్ధం చేయాల్సిందేనంటూ అధికారులు ఆదేశించారు. రష్యా-ఉక్రెయిన్ సరిహద్దు వరకు తీసుకెళ్లి యుద్ధంలో పాల్గొనాలంటూ బెదిరిస్తున్నారు.

తాను యుద్ధం చేయలేనని కిషన్ వేడుకున్నా అధికారులు వినడం లేదని కుటుంబం చెబుతోంది. తన బాధను ఆయన ఫోన్ ద్వారా కుటుంబానికి తెలియజేస్తున్నారు. కుటుంబ సభ్యులు తీవ్ర ఆందోళన వ్యక్తం చేస్తున్నారు. ఏజెంట్ శ్రీనివాస్‌ను కలిసినా ఆయన ఎలాంటి సమాధానం ఇవ్వలేదని కుటుంబం తెలిపింది.

జగిత్యాల జిల్లాకు చెందిన రాజకుమార్ పరిస్థితి కూడా ఇదే. నాలుగు నెలల క్రితం ఒక ఏజెంట్ ఆయన్ను రష్యాకు పంపించారు. అక్కడ సైనిక శిక్షణ ఇచ్చి యుద్ధం చేయాలంటూ ఒత్తిడి చేస్తున్నారు. తాను యుద్ధం చేయలేనని, వేరే ఉపాధి ఉంటే వస్తానని రాజకుమార్ చెప్పినా అధికారులు పట్టించుకోవడం లేదు. భాషా సమస్య కూడా వారిని ఇబ్బంది పెడుతోంది. రాజకుమార్ తల్లి స్థానిక ఎమ్మెల్యే డాక్టర్ సంజయ్‌కు ఫిర్యాదు చేశారు.

ప్రస్తుతం ఇద్దరూ ఉక్రెయిన్ సరిహద్దులో ఉన్నారు. వారికి సైనిక దుస్తులు, ఆయుధాలు ఇచ్చినట్లు కుటుంబాలు చెబుతున్నాయి. సరైన ఆహారం లేదని, అనారోగ్యంతో బాధపడుతున్నారని కుటుంబాలు ఆవేదన వ్యక్తం చేస్తున్నాయి.

ఉమ్మడి కరీంనగర్, ఉమ్మడి నిజామాబాద్ జిల్లాల నుంచి ఇదే విధంగా పలువురు ఏజెంట్ల మోసానికి గురై ఉన్నట్లు కుటుంబాలు చెబుతున్నాయి. రష్యా వెళ్లిన తర్వాత తిరిగి రావడం కష్టమని వారు పేర్కొంటున్నారు. కిషన్ కుటుంబం జిల్లా కలెక్టర్‌కు ఫిర్యాదు చేసింది. ఇప్పటికైనా కేంద్ర ప్రభుత్వం జోక్యం చేసుకుని ఇద్దరిని స్వగ్రామాలకు రప్పించాలని కుటుంబాలు కోరుతున్నాయి.