మురుసు తుఫానుపై CM చంద్రబాబు సమీక్ష: తాగునీరు, విద్యుత్‌కు ప్రాధాన్యం

మురుసు తుఫాను ప్రభావంపై ముఖ్యమంత్రి చంద్రబాబు నాయుడు ఉన్నతాధికారులు, జిల్లా కలెక్టర్లతో టెలీ కాన్ఫరెన్స్ నిర్వహించారు. తుఫాను తర్వాత చేపట్టాల్సిన చర్యలపై అధికారులకు ఆదేశాలు ఇచ్చారు.

తాగునీరు, విద్యుత్ సరఫరా, రోడ్డు కనెక్టివిటీపై ప్రధానంగా దృష్టి పెట్టాలని CM చెప్పారు. ఎక్కడా ప్రాణనష్టం జరగకుండా చూడడం ప్రథమ ప్రాధాన్యత అని ఆయన అన్నారు. చివరి వ్యక్తికి సహాయం అందే వరకు యంత్రాంగం విశ్రమించకూడదని ఆదేశించారు.

తుఫాను తీవ్రత ఈరోజు రాత్రికి పూర్తిగా తగ్గే అవకాశం ఉందని ముఖ్యమంత్రి తెలిపారు. ప్రకాశం, బాపట్ల జిల్లాల్లో వర్షపాతం పెరిగిందని, వచ్చే నాలుగు నుంచి ఐదు గంటలు కీలకమని చెప్పారు. బాపట్ల, గుంటూరు, ప్రకాశం, పల్నాడు, కృష్ణ, ఎన్టీఆర్, ఏలూరు, పశ్చిమ గోదావరి జిల్లాల్లో వర్షాలు కొనసాగుతున్నాయి. 21 పట్టణ ప్రాంతాల్లో అధిక వర్షపాతం నమోదవుతోందని ఆయన తెలిపారు.

ఈరోజు సాయంత్రం వరకు ఎవరూ బయటకు వెళ్లకుండా జాగ్రత్తగా ఉండాలని సూచించారు. జిల్లా కలెక్టర్లను, మున్సిపల్ కమిషనర్లను అప్రమత్తం చేసి క్షేత్రస్థాయిలో యంత్రాంగాన్ని సిద్ధం చేయాలని ఆదేశించారు. కోనసీమ జిల్లాలో నిన్న రాత్రి వర్షం పడినా ఈరోజు పరిస్థితి సాధారణంగా ఉందని చెప్పారు.

చెరువులు, రిజర్వాయర్లు, వాగులు ప్రమాదకర స్థాయిలో లేవని, అయినా నిరంతరం అప్రమత్తంగా ఉండాలని CM తెలిపారు. వర్షపు నీరు వృథా కాకుండా సమర్థవంతమైన నీటి నిర్వహణ చర్యలు చేపట్టాలని సూచించారు. విద్యుత్ సరఫరాకు అంతరాయం ఏర్పడిన ప్రకాశం, బాపట్ల జిల్లాల్లో యుద్ధ ప్రాతిపదికన పునరుద్ధరణ పనులు చేయాలని ఆదేశించారు. తుఫాను సమయంలో అధికారుల నుంచి క్షేత్రస్థాయి సిబ్బంది వరకు అందరూ బాగా పనిచేశారని ఆయన అభినందనలు తెలిపారు.