పార్వతీపురం మున్సిపాలిటీ స్ట్రాంగ్ రూమ్ తాళాలు కనిపించక లెక్కింపు నిలిచిపోయింది

పార్వతీపురం మున్సిపాలిటీ కౌంటింగ్ కేంద్రంలో స్ట్రాంగ్ రూమ్ తాళాలు కనిపించకపోవడంతో ఓట్ల లెక్కింపు ఆగిపోయింది. ఉదయం 9 గంటలకు లెక్కింపు ప్రారంభం కావాల్సి ఉండగా, తాళాలు లభించలేదని అధికారులు గుర్తించారు.

దీంతో కౌంటింగ్ కేంద్రంలో కొంతసేపు ఉత్కంఠ నెలకొంది. ఎన్నికల అధికారులు ప్రత్యామ్నాయ మార్గాలపై దృష్టి పెట్టారు. అభ్యర్థులు, పార్టీ ప్రతినిధులతో వారు చర్చలు జరిపారు.

తాళం పగలగొట్టేందుకు అభ్యర్థుల సమ్మతి కోరుతున్నారు. అభ్యర్థులకు ఫోన్ చేసి, అంగీకారం తెలిపితే రాతపూర్వకంగా ఇవ్వాలని కోరారు. చైర్‌పర్సన్ అభ్యర్థులు అంగీకారం తెలిపారు. కార్పొరేటర్ అభ్యర్థుల సమ్మతి కూడా వస్తే తాళం కట్ చేస్తామని అధికారులు చెప్తున్నారు.

తాళం తొలగించేందుకు ఎలక్ట్రిక్ రంపం అవసరం. దుకాణాలు ఇంతవరకు తెరవకపోవడంతో రంపం తీసుకురావడం ఆలస్యమవుతోంది. టెక్నీషియన్ కూడా అందుబాటులో లేరు. దీంతో లెక్కింపు ఇంకా ఆగింది.

తాళాలు ఎక్కడ ఉన్నాయనే దానిపై అధికారులకు స్పష్టత లేదు. కేంద్రంలో అబ్జర్వర్లు, ఐఏఎస్ అధికారులు, జిల్లా కలెక్టర్, సబ్ కలెక్టర్ ఉన్నారు. అభ్యర్థుల సమ్మతి లభిస్తే తాళాన్ని కట్ చేసి లెక్కింపు ప్రారంభించనున్నారు.