22A భూ దరఖాస్తులను వెంటనే పరిష్కరించాలని కలెక్టర్లకు మంత్రి పొంగులేటి ఆదేశం

22A జాబితాలోని భూ దరఖాస్తులను వెంటనే పరిష్కరించాలని రెవెన్యూ మంత్రి పొంగులేటి శ్రీనివాస్ రెడ్డి కలెక్టర్లను ఆదేశించారు. ఏ ఒక్క దరఖాస్తు కూడా అధికారుల దగ్గర పెండింగ్‌లో ఉండకూడదని ఆయన స్పష్టం చేశారు.

సెక్రటేరియట్‌లో హైదరాబాద్, రంగారెడ్డి, సంగారెడ్డి, మేడ్చల్, మల్కాజిగిరి జిల్లాల కలెక్టర్లు, జిల్లా రిజిస్ట్రార్లతో మంత్రి ఉన్నత స్థాయి సమీక్ష నిర్వహించారు. ప్రతి వారం జిల్లా స్థాయిలో కలెక్టర్, జిల్లా రిజిస్ట్రార్, రెవెన్యూ అధికారులు సమావేశమై దరఖాస్తుల పరిష్కార ప్రగతిని సమీక్షించాలని ఆదేశించారు.

అర్బన్ ల్యాండ్ సీలింగ్ భూములపై రెవెన్యూ శాఖ కార్యదర్శి డీఎస్ లోకేష్ కుమార్ నేతృత్వంలోని హై లెవెల్ కమిటీ అధ్యయనం చేయనుంది. వారంలోగా పూర్తి నివేదిక అందించాలని మంత్రి గడువు విధించారు. నివేదిక అందిన వెంటనే ఉన్నత స్థాయిలో చర్చించి, పేద, మధ్యతరగతి ప్రజలకు అనుకూలంగా నిర్ణయం తీసుకుంటామని ఆయన తెలిపారు.

న్యాయస్థానాలు ఇచ్చిన తీర్పులపై ప్రభుత్వం తరపున స్పెషల్ లీవ్ పిటిషన్లు (SLP) దాఖలు చేయడానికి అవకాశం లేని ఇతర భూములను ఈ కమిటీ పరిశీలిస్తుంది. జిల్లా స్థాయిలో పరిష్కారం కాని క్లిష్ట సమస్యలను హై లెవెల్ కమిటీకి సిఫారసు చేయాలని మంత్రి ఆదేశించారు. 22A జాబితాలోని ప్రతి భూమికి సంబంధించిన రెవెన్యూ రికార్డులు, రిజిస్ట్రేషన్ చైన్ డాక్యుమెంట్లను నిశితంగా పరిశీలించాలని ఆయన దిశానిర్దేశం చేశారు.

GHMC, HMDA, DTCP లేదా స్థానిక మున్సిపాలిటీల నుంచి చట్టబద్ధమైన లేఅవుట్ అనుమతులు పొందిన ఇళ్లు, ఓపెన్ ప్లాట్లు, అపార్ట్‌మెంట్ ప్లాట్ల రిజిస్ట్రేషన్లకు ప్రభుత్వం అనుమతులు మంజూరు చేసిందని మంత్రి చెప్పారు. మార్గదర్శకాలకు అనుగుణంగా అర్హత ఉన్న భూముల రిజిస్ట్రేషన్‌కు ఎలాంటి ఆటంకాలు ఉండకూడదని ఆయన సూచించారు.

ప్రభుత్వ భూములు, చెరువులు, దేవాదాయ, వక్ఫ్, ప్రజా ప్రయోజనాలకు సంబంధించిన భూముల విషయంలో చట్టపరమైన నిబంధనలను పూర్తిగా పాటించాలని మంత్రి ఆదేశించారు. ప్రభుత్వ భూముల పరిరక్షణలో కఠినంగా వ్యవహరించాలని, కబ్జాదారులపై చర్యలు తీసుకోవాలని కలెక్టర్లను ఆయన ఆదేశించారు.

ఏళ్ల తరబడి అపరిష్కృతంగా ఉన్న 22A భూములకు శాశ్వత పరిష్కారం చూపి బాధితులకు ఉపశమనం కలిగించడమే ప్రభుత్వ లక్ష్యమని మంత్రి పొంగులేటి తెలిపారు. క్షేత్ర స్థాయిలో భూమి స్వభావాన్ని పూర్తి ఆధారాలతో నిర్ధారించుకున్న తర్వాతే అనుమతులు మంజూరు చేయాలని ఆయన స్పష్టం చేశారు.