కేంద్రానికి తెలంగాణ మంత్రుల విజ్ఞప్తి: లక్ష్యం మించిన ధాన్యాన్ని కొనుగోలు చేయాలని కోరిక

తెలంగాణ మంత్రులు ఉత్తం కుమార్ రెడ్డి, తుమ్మెల నాగేశ్వరరావు ఢిల్లీలో కేంద్ర మంత్రులతో భేటీ అయ్యారు. రాష్ట్రంలో లక్ష్యం మించి కొనుగోలు చేసిన ధాన్యాన్ని కేంద్రం ఫుడ్ కార్పొరేషన్ ద్వారా తీసుకోవాలని విజ్ఞప్తి చేసినట్టు వారు తెలిపారు.

ఈ యాసంగి సీజన్లో 80 లక్షల మెట్రిక్ టన్నుల వరి ధాన్యం కొనుగోలు చేసి, రైతులకు పూర్తి చెల్లింపులు చేసినట్టు చెప్పారు. కేంద్రం నిర్ణయించిన లక్ష్యం 51 లక్షల మెట్రిక్ టన్నులు కాగా, అదనంగా 29 లక్షల మెట్రిక్ టన్నులను సేకరించామని పేర్కొన్నారు.

యూరియా ఎరువుల కేటాయింపులో విభేదాలు ఉన్నాయని, కేంద్రం నుంచి తెలంగాణకు యూరియా పూర్తిగా రాలేదని మంత్రులు వివరించారు. జూన్లో సీజన్ మొదలవడంతో మళ్లీ డిమాండ్ చేయనున్నట్టు తెలిపారు.

అదే సమయంలో, పప్పు ధాన్యాలు, నూనె గింజలు, మొక్కజొన్న, జొన్న పంటలను కూడా ఎంఎస్పీ ధరకు కొనుగోలు చేయాలని, 25% పరిమితి ఎత్తివేయాలని వ్యవసాయ మంత్రితో చర్చించినట్లు చెప్పారు. ఈ ఏడాది తెలంగాణలో 15 లక్షల టన్నుల మొక్కజొన్న, 3 లక్షల టన్నుల జొన్న పండించినట్టు పేర్కొన్నారు.

కేంద్రం నిర్ణయం తీసుకుంటే రైతులకు మేలు జరుగుతుందని మంత్రులు అభిప్రాయపడ్డారు.