పాస్‌పోర్ట్ వెరిఫికేషన్‌లో తెలంగాణ పోలీసులకు జాతీయ అవార్డు

పాస్‌పోర్ట్ ధృవీకరణ ప్రక్రియలో అత్యుత్తమ పనితీరు కనబరిచినందుకు తెలంగాణ పోలీసులకు కేంద్ర ప్రభుత్వం ప్రతిష్టాత్మక అవార్డు ప్రదానం చేసింది. ఢిల్లీలో విదేశాంగ మంత్రిత్వ శాఖ నిర్వహించిన కార్యక్రమంలో డీజీపీ సీవీ ఆనంద్ ఈ అవార్డును అందుకున్నారు.

‘ఇన్‌స్టిట్యూషనల్ పెర్ఫార్మెన్స్ అవార్డ్ ఫర్ స్టేట్ పోలీస్’గా పిలిచే ఈ పురస్కారం, పాస్‌పోర్ట్ వెరిఫికేషన్‌లో వేగం, పారదర్శకతకు గుర్తింపుగా లభించింది. రాష్ట్ర పోలీసులు 2025-26 సంవత్సరంలో రికార్డు స్థాయిలో 8.67 లక్షల పాస్‌పోర్ట్ దరఖాస్తులను స్వీకరించి, వాటిలో 99% ధృవీకరణను ఎలాంటి జాప్యం లేకుండా పూర్తి చేశారు.

దరఖాస్తుదారులకు కేవలం ఐదు నుంచి ఏడు రోజుల్లోనే పాస్‌పోర్ట్ పోలీస్ వెరిఫికేషన్ పూర్తవుతోందని అధికారులు తెలిపారు. ఈ విజయం వెనుక పోలీసు శాఖ అమలు చేస్తున్న సాంకేతిక సంస్కరణలు, సిబ్బంది అంకితభావం ఉన్నాయని డీజీపీ అభిప్రాయపడ్డారు. భవిష్యత్తులోనూ ప్రజలకు సులభంగా, వేగంగా సేవలు అందిస్తామని ఆయన తెలిపారు.