విద్యుత్ డిమాండ్ అకస్మాత్తు 50% పెరిగినా సరఫరాలో ఇబ్బందులు లేవు: భట్టి విక్రమార్క

తెలంగాణలో వర్షాకాలంలో విద్యుత్ డిమాండ్ ఊహించని స్థాయిలో పెరిగినా ప్రజలకు కరెంటు కోత విధించకుండా చర్యలు తీసుకుంటున్నామని ఉపముఖ్యమంత్రి భట్టి విక్రమార్క తెలిపారు. భద్రాద్రి కొత్తగూడెం జిల్లా ఎల్లందు నియోజకవర్గంలో జరిగిన అభివృద్ధి కార్యక్రమాల్లో ఆయన ఈ వ్యాఖ్యలు చేశారు.

ప్రభుత్వం విద్యుత్ సమస్యల పరిష్కారానికి సబ్ డివిజన్ స్థాయిలో 165 పవర్ అంబులెన్సులను ప్రారంభించింది. సింగరేణి ఉద్యోగులకు ప్రత్యేకంగా కోటి రూపాయల బీమా పథకాన్ని అమలు చేస్తున్నట్టు భట్టి వివరించారు. గిరిజన ప్రాంతాల్లో పోడు భూముల రైతుల కోసం “ఇందిరా సౌర జల వికాసం” పథకం ద్వారా సాగునీరు అందిస్తున్నామన్నారు.

విద్యుత్ డిమాండు గణాంకాలను ఆయన పంచుకున్నారు. సాధారణంగా జూలైలో గరిష్ట డిమాండ్ 11,000 మెగావాట్లు ఉండగా, ఈసారి ఒక్క వారంలోనే 16,600 మెగావాట్లకు చేరింది. అంటే 5,600 మెగావాట్లు అదనంగా పెరిగిందని, ఇది దాదాపు 50% వృద్ధి అని తెలిపారు. వర్షాకాలంలో ఇంత స్థాయిలో డిమాండ్ రావడం ఇంతకుముందు ఎప్పుడూ జరగలేదన్నారు.

అయినప్పటికీ విద్యుత్ సరఫరా సాఫీగా కొనసాగుతోందని, ఎలాంటి అంతరాయాలు లేకుండా అధికారులు పనిచేస్తున్నారని ఉపముఖ్యమంత్రి హామీ ఇచ్చారు.