ప్రైవేట్ ఇంజనీరింగ్ కాలేజీల్లో అదనపు ఫీజుల వసూలు; విద్యార్థులు, తల్లిదండ్రులు ఆందోళన

తెలంగాణలో ప్రైవేట్ ఇంజనీరింగ్ కాలేజీలు కన్వీనర్ కోటా సీటు వచ్చిన విద్యార్థుల నుంచి అదనపు ఫీజులు వసూలు చేస్తున్నాయి. ప్రభుత్వం అదనపు ఫీజు వసూలు చేయవద్దని స్పష్టమైన ఆదేశాలు జారీ చేసినప్పటికీ, చాలా కళాశాలలు వాటిని పాటించడం లేదు. విద్యార్థుల నుంచి రూ.20,000 నుంచి రూ.50,000 వరకు నగదు రూపంలో వసూలు చేస్తున్నారు. రాష్ట్రవ్యాప్తంగా ఈ అక్రమ వసూళ్లు రూ.200 కోట్లకు పైగా ఉంటాయని అంచనా.

తెలంగాణలో 176 ఇంజనీరింగ్ కాలేజీలు ఉండగా, 157 ప్రైవేట్ కాలేజీలు. కన్వీనర్ కోటాలో దాదాపు 90,000 సీట్లు ఉన్నాయి. 2025-26 నుంచి 2027-28 విద్యా సంవత్సరాలకు గాను ఫీజుల నియంత్రణ కమిటీ (TAFRC) కొత్త ఫీజులను నిర్ణయించింది. 70 కాలేజీల్లో పాత ఫీజులే కొనసాగుతుండగా, 63 కాలేజీల్లో స్వల్పంగా పెరిగాయి. కొత్త ఫీజులను వ్యతిరేకించిన ప్రైవేట్ కాలేజీలు కోర్టులో ఊరట లభించకపోవడంతో, ఇప్పుడు అడ్మిషన్ల సమయంలో అదనపు పేరుతో లోటును భర్తీ చేయాలని చూస్తున్నాయి.

ప్రభుత్వం ఈ సంవత్సరం ట్యూషన్ ఫీజు తప్ప మరే ఇతర ఫీజు వసూలు చేయరాదని జీఓ విడుదల చేసింది. గతంలో అడ్మిషన్ సమయంలో రూ.5,500 లేదా రూ.8,500 తీసుకోవడానికి అనుమతి ఉండేది. అయినా కాలేజీలు లైబ్రరీ, ల్యాబ్ ఫీజు, అడ్మిషన్ ఫీజు, కెరీర్ డెవలప్మెంట్ చార్జీలు, ఎన్బీఏ స్పెషల్ ఫీజు, ట్రైనింగ్ అండ్ ప్లేస్మెంట్ ఫీజు వంటి పేర్లతో అదనపు డబ్బులు డిమాండ్ చేస్తున్నాయి. ఫీజు కట్టకపోతే సీటు రద్దు చేస్తామని బెదిరిస్తున్నాయి. డబ్బులు ఆన్‌లైన్ లేదా చెక్కు రూపంలో కాకుండా నగదులోనే తీసుకుంటూ రసీదు ఇవ్వకపోవడంతో విద్యార్థులకు ఆధారాలు లేకుండా పోతున్నాయి.

ముఖ్యమంత్రి రేవంత్ రెడ్డి కాలేజీల యాజమాన్యాలను హెచ్చరించినా, అవి అమలు కాలేదు. విద్యార్థి సంఘాలు నిబంధనల విరుద్ధంగా వసూలు చేసిన ఫీజులపై సమగ్ర విచారణ చేయించి చర్యలు తీసుకోవాలని, ఇప్పటికే వసూలు చేసిన డబ్బు తిరిగి ఇవ్వాలని డిమాండ్ చేస్తున్నాయి. ట్యూషన్ ఫీజు నిర్ణయించేటప్పుడే ల్యాబ్, లైబ్రరీ, ట్రైనింగ్ వంటి సదుపాయాల ఛార్జీలు కలిపే నిర్ణయించారు. అయినా ప్రైవేట్ కాలేజీలు అదే పేర్లతో విడివిడిగా వసూలు చేస్తున్నాయి.